ВИДЕО: Аммаҕа «Өйдөбүнньүк марафона — 80 км» хайыһарга аһаҕас турнир түмүктэннэ

Аммаҕа «Марафон памяти-80 км» аһаҕас хайыһар турнира ситиһиилээхтик түмүктэннэ.

Кулун тутар 29 күнүгэр Амма улууһугар улахан тэрээһининэн «Өйдөбүнньүк марафона — 80 км» диэн  аһаҕас хайыһар турнира Улуу Кыайыы 80 сылыгар ананан Өнньүөс-Лээги хайысханан  ыытылынна. 80-тан тахса км усталаах сири  хайыһардьыт спортсменнар Аҕа дойду Улуу сэриитин дьоруойдарын хорсун быһыыларыгар анаатылар.  Марафон түмсүү бэлиэтинэн буолла. Араас саастаах хайыһардьыттар, ол иһигэр уопуттаах спортсменнартан саҕалаан хайыһары таптааччылар уустук дистанцияны ааһан дьиҥнээх тургутууну аастылар.

Турнир кыайыылаахтара уонна призердара маннык быһаарылыннылар: 1 миэстэ — Никита Шестаков (Амма) — 80 000 солк., 2 миэстэ — Эрэл Тарков (Муома) — 55 000 солк., 3 миэстэ-Николай Максимов (Сулҕаччы) — 30 000 солк. туттулар.

Кыттыбыт спортсменнарга, тэрийээччилэргэ, тэрээһини өйөөбүт уонна ыытыыга көмөлөспүт дьоҥҥо барҕа махталы тылларын аныыбыт, диэн улуус дьаһалтатын пресс-сулууспата иһитиннэрэр.