ВИДЕО: Аммаҕа сиэдэрэй Сардаана сибэкки хонуулары киэргэттэ

«Сардааналаах хонуу кэрэтиэн. Быйыл сардаанабыт арыый эрдэ тыллыбыт дуу? Сардаана — Амма күндү чөмчүүгэ, Сардаана — самаан сайын сүрэҕэ. Кинини үргээмэҥ, харыстааҥ, кэрэтинэн дуоһуйуҥ!», — диэн «Амма олоҕо» хаһыат телеграм-ханаала суруйар.

Бу сибэкки 2000 сыллаахха Саха сирин Кыһыл кинигэтигэр киллэриллибитэ. Аан дойду үрдүнэн  Кыһыл кинигэҕэ киллэриллибит үүнээйилэри хостоон ылар уонна атын сиргэ олордор сокуонунан бобуллар. Научнай сыалга даҕаны, сэдэх үүнээйилэри кытта үлэлииргэ эрдэтинэ сөбүлэһиэххэ наада.

Сиэдэрэй Сардаана сибэкки (Пенсильвания лилията) Саха сирин араас улуустарыгар өҥүнэн уратылаһар: саһархайдыҥы-кытархай, саһархай, чаҕылхай кыһыллар уонна кыһыл араас эгэлгэлэрэ бааллар, ону таһынан биир кэлим өҥнөөх эминньэхтээхтэр, сурааһыннардаах уонна чуоҕурдаахтар эмиэ көстөллөр.