ВИДЕО: Аны күһүн «Сибэкки биэрээри» диэн саҥа драма тахсыаҕа

Саха киинэтэ сотору кэминэн өссө биир интэриэһинэй бырайыагынан эбиллиэҕэ.

«Маринад» уонна «Линия» киинэлэр режиссердара Василий Слепцов бэйэлэрин олоххо дьулуурдарын сүтэрбит көлүөнэ — орто саастаах эр дьон туһунан «Сибэкки биэрээри» диэн драма киинэтин киэҥ экрааҥҥа таһаарыа.

Киинэ Семен Ермолаев пьесатыгар олоҕуран уһулунна. Продюсерынан Алексей Михайлов үлэлээтэ. Үс доҕордуулар – Бааска, Сааска уонна Петька – эргэ дэриэбинэ кулуубугар мусталлар уонна оҕо саастарын доҕоро, тас дойдуттан кэлбит Вадим, кинилэри сыбаайбаҕа ыҥырбатаҕын истэллэр. Кинилэр  доҕордорун сүтэрбит аһыытын кыайаары, ааспыты ахтан, ордук олох туһунан ыра санааҕа ыллараллар.

«Киинэ күһүн тахсыаҕа, ол эрээри Василий драма кистэлэҥ быыһын сэгэтэн, киинэ туох туһунан буоларын сиһилии кэпсээтэ, – диэн «Сахафильм» хампаанньа пресс-сулууспата суруйар.

«Уопсастыбаҕа маннык «стереотип» баар: эн эр киһи буоллаххына — итини оҥоруохтааххын,  маны биэриэхтээххин,  ону ситиһиэхтээххин. Ол эрээри, эр киһи эмиэ — киһи, робот буолбатах, кини эмиэ иэйиигэ ылларар, ытыыр диэн көрдөрүөхпүн баҕарбытым. Сорохтор билигин эр дьону мөлтөхтүк көрдөрдүҥ диэхтэрэ, ол гынан баран хас биирдии киһи бу персонажтарга бэйэтин кытта холонон көрүөҕэ» — диир Василий Слепцов.