Хаартыска А.Р.Петров тус архыыбыттан
Үөһээ Бүлүү улууһуттан төрүттээх, Саха сириттэн 12-с Арассыыйа Дьоруойа Алексей Петров-«Медведь» «Шторм-2» 39-с мотострелковай биригээдэҕэ сылдьан кытаанах кыргыһыыларга хорсуннук-хоодуоттук кыттыбыта. Бу күннэргэ Саха сирэ ньургун уолун Арассыыйа Дьоруойа үрдүк ааты ылбытынан уруйдуур-айхаллыыр.
Бу аат-суол киниэхэ чэпчэкитэ суохтук, дьоруойдуу хорсун быһыыны көрдөрөн, тимир курдук буһарыллан-хатарыллан, эт-хаан улахан эчэйиитин ылан ситиһиллибитэ. Ол туоһутунан Алексей Петров бойобуой биографиятын биир түгэнин военкордар устубуттара буолар.
Алексей бойобуой олоҕун туһунан кылгастык сырдатан ааһар тоҕоостоох. «Медведь» дьонугар иккитэ өлбүтүн туһунан биллэрии кэлэн, аймана сылдьыбыттара. Ыараханнык бааһыран, аҕыс күнү быһа өй-мэй барар ыарыыны тулуйан, икки атаҕар бааһырдар даҕаны, хорсун буойун инники кирбииттэн тыыннаах тахсыбыта.
Анал байыаннай дьайыыга 2024 сыл сайыныгар тиийбит, онтон ыла бойобуой сырыылара саҕаламмыттар. Ханнык да түгэҥҥэ, биир да сөкүүндэҕэ санаата самныбатах, куттанар, чугуйар диэни билбэккэ, иннин диэки дьулуруйара.
Дьоруойу кытары кэпсэтэрбэр маннык диэн турардаах.
«Оборуона тута сытан, эмпит да, аспыт да бүтэн, тоҥон-хатан бардыбыт. Кэмниэ кэнэҕэс, сатаан хаамар дьону илдьэ төттөрү тахсарга көҥүл биэрдилэр. Онон мин, дьонум төттөрү кэллэхтэринэ тахсаары, хаалар буоллум. Хааным баран, атахтарым истибэт буолан, түүл-бит курдук, өйбүн сүтэрэн ылабын. Ол сытан дойдубун, ийэбин, дьүөгэбин Ульянаны көрөбүн. Дьүөгэм быыһаабыта – сэниэм эстэн, түҥ-таҥ сыттахпына, дьүөгэм Ульяна кэлэр курдук уонна итинэн бар, манан таҕыс диэн ыйан биэрэр, оччоҕо онон сыылан, атын блиндажка көһөбүн. Ол кэнниттэн хаста даҕаны эрдэ сыппыт сирдэрим аайы дроннар кэлэн снаряд быраҕаллар. Урут итэҕэли улаханнык аахайбат буоллахпына, дьикти баарын итэҕэйдим. Биир сарсыарда арай бу иннинэ сыппыт блиндаһым аттыгар массыына тохтоото, үс киһи тахсан, гранатанан тамнаатылар. Блиндаһы өҥөйөн көрөн баран, массыыналарыгар олорон төттөрү бардылар. Сарсыныгар эмиэ кэллилэр, бу сырыыга мин сытар сирбиттэн олох чугас. Мин бэлэм сыппыт буоламмын, бастаан массыынаҕа хаалбыт бүлүмүөттээх киһини ыттым, онтон хаалбыттары суох оҥордум. Ол дьон суумкатыттан, ыарыыны мүлүрүтэр укуолу уонна бородуукта булан, укуолланным, тото-хана аһаатым. Хата ол киэһэ уолаттарым кэлэн, хаар түһэн тахсар буоллубут. Кып-кыра, хап-хачаайы «Дацик» диэн уол сүгэн-соһон таһаарбыта. Кэлин истибитим, хамандыыр тугу даҕаны кэрэйбэккэ, «Медведи» таһаарыҥ диэн бирикээс биэрбит. Ол сарсыныгар эвакуационнай бөлөх кэлэн бастаан Угледарга, онтон Ростовка аҕалбыттара», — диэн биһиги дьоруойбут кэпсиир.
Арассыыйа Дьоруойугар түһэриллибитин Алексей госпитальга сытан командованиетыттан истибит. Син өр кэмҥэ докумуонун көрөн, видеонан хорсуннук кыргыспытын туһунан дакаастабыл баар буолан, бу күннэргэ дойду Бэрэсидьиэнэ Алексей Петровка Арассыыйа Дьоруойа үрдүк ааты иҥэрдэ.
39-с туспа гвардейскай мотострелковай Кыһыл Знамя биригээдин штурмовой этэрээтин байыаһа, Саха сирин 12-с Арассыыйа Дьоруойа Алексей Петров бойобуой сырыыта Военкордар устууларынан таҕыста.
«Медведь» позывнойдаах Алексей Петров туһунан сиһилии бу сигэнэн киирэн ааҕыҥ: https://sakha-sire.ru/medved-elyyny-kyajbyt-horsun-bajyas/
СӨ салалтатын уонна тус бэйэм ааппыттан эһигини Шахтер күнүнэн ис сүрэхпиттэн эҕэрдэлиибин! Бу күн биһиги…
РФ Социальнай пуондатын 2025 сыллааҕы дааннайдарынан, куоракка олорор дойду олохтоохторун орто биэнсийэлэрин кээмэйэ тыа сирин…
Бүгүн, атырдьах ыйын 31 күнүгэр, өрөспүүбүлүкэ икки улууһугар быстах кэмҥэ өрөмүөн үлэтэ ыытылларынан сибээстээн, күн…
Бүгүҥҥү күн Кыыс бэлиэтигэр киирэн, биһигиттэн чопчу буолууну, болҕомтону уонна олоҕу сааһылааһыны ирдиир. Дьыалаҕа-куолуга, үлэҕэ-хамнаска,…
Өрөспүүбүлүкэ үгүс улуустарынан бүгүн, атырдьах ыйын 31 күнүгэр, сөҥүүтэ суох, сылаас күн. Сорох сиринэн быстах…
Үнүр солуоҥҥа тыҥырах оҥорторо тиийдим. Дьоҕус остуолга “Хаас оҥорторорбор гепатит, СПИД, сифилис уо. д. а. ыарыылар сыстыахтарын…