ВИДЕО: Байыаннай дьайыы зонатыттан тиэхиньикэ Саха сиригэр аҕалылынна

Бэҕэһээ, алтынньы 25 күнүгэр, байыаннай дьайыы ыытыллар сириттэн былдьаммыт байыаннай тиэхиньикэ Аллараа Бэстээххэ кэлбитэ. 

Бүгүн тиэхиньикэ Дьокуускай куоракка  «Арассыыйа – мин устуоруйам» историческай пааркаҕа туттарылынна. Биһиги байыастарбыт алдьаппыт тиэхиньикэлэрин бу сыл сэтинньи 3 күнүттэн 9 күнүгэр диэри  — Норуот сомоҕолоһуутун күнүгэр анаан дьон-сэргэ көрүүтүгэр туруоруохтара.

«Дьокуускайга байыаннай дьайыы кэмигэр биһиги буойуннарбыт былдьаабыт бронетиэхиньикэлэрэ кэллилэр. Киевскэй эрэсиими өйүүр дойдуларга оҥоһуллубут түөрт бронетранспортер уонна биир бойобуой массыына Сахабыт сиригэр аҕалылыннылар. Бу массыыналар – Аҕа дойду Улуу сэриитин кэминээҕи курдук, Арассыыйа уонна бүтүн аан дойду дьылҕата быһаарыллар кыргыһыытын тыла суох кэрэһиттэрэ буолаллар. Бу тиэхиньикэни фашистары кыайбыт биһиги саллааттарбыт былдьаан ылбыттара.  Саха сирин олохтоохторо дойду бүтүннүүтүн кытта бииргэ өбүгэлэрин дьыалатын салгыыллар – Ийэ дойду чиэһин уонна тутулуга суох буолуутун көмүскээн, эр санааларын, тулуурдарын, бирисээгэлэригэр бэриниилээхтэрин көрдөрөллөр. Илиҥҥи байыаннай уокурук салалтатыгар быыстапканы тэрийиигэ көмөлөрүн уонна устуоруйа өйдөбүлүн харыстыыр үлэни өйөөбүттэрин иһин ураты махталы тиэрдэбин. Былдьаммыт тиэхиньикэ быыстапката «Арассыыйа – мин устуоруйам» историческай пааркаҕа ыытыллыаҕа. Бу – ааспыт кэм, бүгүҥҥү күн уонна кэлэр кэскил биир кэлим дьылҕа суолугар силбэһэр сирэ. Манна хас биирдии киһи Аҕа дойду Улуу сэриитин туһунан өйдөбүл бүгүҥҥү хорсун быһыыларга тыыннааҕын, оттон кут-сүр күүһэ уонна Ийэ дойдуга таптал дойдубут сүрүн тирэҕинэн буолалларын илэ хараҕынан көрүөҕэ. Манна, Саха сиригэр, устуоруйа салгыы дуорайар – Арассыыйаны Кырдьык уонна Кыайыы бэлиэтинэн үйэлэргэ ааҕар дьон сүрэҕэр, быһыытыгар-майгытыгар уонна итэҕэлигэр тыыннаах», — диэн Ил Дархан Айсен Николаев ТГ-ханаалыгар суруйар.

Тэрээһин өрөспүүбүлүкэбитигэр ыытыллар киэҥ далааһыннаах «Норуот уонна аармыйа – биир сомоҕо» Фашизмы утары пуорум чэрчитинэн тэриллэр. Бу күннэр усталарыгар пуорум кыттыылаахтарыгар пленарнай мунньахтар, араас кэпсэтии түһүлгэлэрэ, устуоруйаҕа аналлаах быыстапкалар уонна улахан патриотическай кэнсиэр тэриллиэхтэрэ.