ВИДЕО. Бэйдиэ сылдьар ыттар наһаалаатылар

Бэйдиэ сылдьар ыттар киин куорат кытыы уулуссаларыгар эрэ буолбакка, Аппа уҥуор түөлбэ Матросов, Тимирязев уулуссаларынан олус элбээбиттэр.

Олохтоохтор биир кэлим диспиэччэрскэй сулууспаҕа хаста да сайаапка түһэрбиттэр даҕаны ыттары тутуу үлэтэ ыытыллыбатах. Оройуон олохтоохторун сүрүн кыһалҕалара — оптуобус тохтобулугар оҕолору атаарыы буолбут. Киэһэ хараҥаҕа, сарсыарда боруҥуйга ыттар үрэ-үрэ дьону сырсалларын туһунан социальнай ситим бөлөҕөр тахсыбыт айдаан туоһулуур. Маны таһынан, ыттар аһары баран «Наташа» суорҕанынан сабыллан турар массыыналар үрдүлэригэр тахсар буолбуттар.

Матросов  уулусса  1 №-дээх дьиэтин олохтооҕо үс оҕолоох ийэ Зинаида санаатын үллэһиннэ:

— Оптуобус тохтобулугар диэри сатыы барар олус сэрэхтээх буолла. Бэйдиэ сылдьар ыттар арай оҕолорго саба түстүннэр. Тоҕо миэрэ ылбаттарый?, — диэтэ.