ВИДЕО: Бүлүүлэр «Ыллыыр кумахтар» саҥа набережнай арыллыытыгар бэлэмнэнэллэр

Өрөбүллэргэ Бүлүүгэ набережнай бырайыагын оҥорор «GRD» архитектурнай бюро бэрэстэбиитэллэрэ оробуочай сырыыларынан үлэлээтилэр. Исписэлиистэр үлэ тэтиминэн уонна хаачыстыбатынан, итиэннэ бырайыак бастакы хардыыларын олоххо киирэн иһэринэн астыналларын бэлиэтээтилэр. Бу туһунан «GRD» архитектурнай бюро ТГ-ханаала иһитиннэрэр.

Эбийиэк үөрүүлээх аһыллыыта балаҕан ыйын 6 күнүгэр, Бүлүү куоратын күнүн чэрчитинэн, буолуоҕа. Саҥа набережнай олохтоохторго уонна куорат ыалдьыттарыгар суолталаах уопсастыбаннай миэстэнэн буолан, туризм сайдыытыгар уонна олох хаачыстыбатын үрдэтиигэ көмөлөһүөҕэ диэн күүтүллэр.

Билиҥҥи туругунан, куорат дьаһалтата набережнайы салгыы сайыннарар уонна иккис түһүмэҕи олоххо киллэрэр бырайыактары талар куонкуруска кыттарга бэлэмнэниини саҕалаата. Туһаныллар зоналары кэҥэтии, чугастыы сытар сири-уоту тупсарыы былааннанар. Иккис түһүмэххэ ландшафт уратытын уонна куорат олохтоохторун ирдэбиллэрин учуоттуур кэнсиэпсиэйни сиһилии оҥоруу киириэҕэ. Иккис түһүмэҕи олоххо киллэрии комфорт уонна эстетика үрдүк ирдэбиллэригэр эппиэттиир толору, аныгы набережнайы оҥорорго кыаҕы биэриэҕэ.