ВИДЕО: Дьокуускай куорат оскуолатын остолобуойугар бастакы робот-официант үлэлээтэ

Дьокуускай куорат 40-с нүөмэрдээх оскуолатын остолобуойугар ураты, футуристическай кэриэтэ эйгэ буола турар. Остуоллар икки ардыларынан бэрт сылбырҕатык киирэн-тахсан улахана суох, киэҥ экран-харахтардаах “үлэһит” сылдьар. Бу саҥа көмөлөһөөччү – Дьокуускай куорат үөрэҕин управлениетын начаалынньыгын көҕүлээһининэн аан маҥнай олоххо киирбит BellaBot робот-официант.

“Кини сүрүн соруга – астаах подностары таһан дьуһуурунай оҕолорго көмөлөһүү. Оҕолор сөҕүү-махтайыы бөҕө, үлэ тэтимирдэ, сэргэхсийдэ уонна кэлэр кэмтэн быһа тардыы курдук.

BellaBot — навигациянан, харгыстары туоруур датчиктарынан хааччыллыбыт, хас даҕаны поднос-полкалардаах өйдөөх массыына. Робот эрдэттэн киллэриллибит сыҕарыйарыгар аналлаах каартанан сирдэтинэн, дьону, остуоллары сэрэнэн тумнан бэйэтэ сылдьар” – диэн ресурснай хааччыйыы киинин дириэктэрэ Варвара Кычкина кэпсиир.

Робот кыаҕа:

Автономнай үлэ: хонтуруола суох эрдэттэн ыйыллыбыт туочукаларынан сылдьан аһылыгы тарҕатар/

— ыйааһыннааҕы көтөҕөр: хас даҕаны подноһу тэҥинэн таһар.

Куттала суох: бары датчиктара уонна сымнаҕас бампер харсыһыыга, эчэйиигэ тириэрдибэт

Интерактив: “Осторожно, горячо!” диэн саҥарыан, болҕомтону тардыан сөп.

Дьокуускай куорат үөрэҕин управлениета уонна ресурснай хааччыйыы киинэ робот-көмөлөһөөччүнү бэрэбиэркэлээн көрүү быһыытынан үлэлэтэллэр.  Өскөтүн робот үлэтин уопута үчүгэй диэтэхтэринэ куорат атын улахан оскуолаларыгар эмиэ баар буолуохтарын сөп диэн Дьокуускай куорат үөрэҕин управлениетын МАХ сыһыарыытыгар иһитиннэрэллэр.