ВИДЕО: Өймөкөөн Төрүтүгэр ыал тиэргэнин аттыгар тыатааҕы сылдьара билиннэ

Бэҕэһээ Өймөкөөн улууһун Төрүт нэһилиэгэр түүн 23 чаас саҕана тыатааҕы бөһүөлэккэ киирбитин оҕолор суотабай төлөпүөҥҥэ устубут видеолара нэһилиэк «Төрүт кэскилэ» социальнай ситимигэр тарҕаммыта. 

Олохтоох дьаһалта баһылыга Владимир Алексеев: «Бэҕэһээ тыатааҕы нэһилиэккэ ыал тиэргэниттэн чугас сылдьарын туһунан иһитиннэрии киирбитэ.

Ону истээт, Михаил Егоровтыын нэһилиэки  эргийэн көрбүппүт да, суоҕа. Сыбаалкаҕа өрүү кэлэрин истэр буолан, түүн 2 чааска диэри онно бэйэм тиийэн кэтээбитим, кэлбэтэҕэ. Бүгүн Иннокентий Неустроев матасыыкылынан сылдьан, массыына суолун диэки тиийэн көрдө-иһиттэ, биллибэт үһү. Киэһэ Александр Атласовтыын нэһилиэк кытыытынан,  чугаһынан бэрэбиэркэлиэхпит. Олохтоохтору ырааппаттарыгар, тыаҕа барарга туттуналларыгар  сэрэттибит», — диэн иһитиннэрдэ.

Олохтоох  дьокутаат Октябрина Столярчик  бүгүҥҥү   балаһыанньа хайдаҕын маннык кэпсээтэ:

— Кэлиҥҥи сылларга нэһилиэкпит чугаһынан тыатааҕы сылдьар түбэлтэтэ үксээтэ. Бэҕэһээ  бөһүөлэк кытыытыгар олорор ыал тиэргэнин аттыгар массыына суолугар киирбитин оҕолор көрбүттэр этэ.

Олохтоох булчуттар кэтии-маныы  сылдьаллар үһү. Матасыыкыл тыаһыттан  истэн куотар дииллэр. 4 саастаах тыатааҕы үһү. Аҕыйах хонуктааҕыта айаннаан иһэр суоппардар массыына суолугар көрбүттэр этэ. Арааһа, ол тыатааҕы сырыттаҕа.

Олохтоохтор тыатааҕы нэһилиэккэ киириитин сэдэх түбэлтэ диэн бэлиэтииллэр.  Сүөһүлээх дьон бу күннэргэ тыатааҕыттан сэрэхэдийэн, ол  санаатыгар ылларан олороллор.