ВИДЕО: Өлүөхүмэҕэ лыах тиллибит

Быйыл кыһын хаһааҥҥытааҕар даҕаны тымныйда, хаардаата. Ол да буоллар сорох улуустарынан лыах номнуо тиллибит дииллэр. Ханна?

Бүгүн Өлүөхүмэҕэ лыах тиллибит үһү диэн бассаабынан хаартыска тарҕанна. Видео ааптара Өлүөхүмэ куорат олохтооҕо: “Билигин Өлүөхүмэҕэ киэһэ -4 кыраадыс тымныы, күнүс күннээх, сылаас этэ. Билигин даҕаны хаарбыт уулла илик. Күнүс тэлгэһэбэр тахсан маска лыах олорорун түбэһэн видеоҕа устубутум. Тус бэйэм муус устарга лыах тиллибитин саҥа көрдүм”, — диэн кылгастык санаатын үллэһиннэ.

Бу күннэргэ атын даҕаны улуустарга лыах тиллибитин туһунан иһитиннэриилэр кэлэллэр. Холобур, бүгүн Суоттуга сахсырҕа тиллибитин хаартыскаҕа түһэрэн ыыппыттар.

Биир курдук киһи итинтэн соһуйара суохха дылы. Тоҕо диэтэххэ, урукку сылларга баччалартан үөн-көйүүр көстөн барара. Холобура, үс сыллааҕыта муус устар ортотугар Горнай улууһугар лыах тиллибит, оннооҕор баҕаны көрөн хаартыскаҕа түһэрбиттэр этэ.

Муус устар сүүрбэтэ бу кэллэ да, халлаан өссө даҕаны тымныы, хаар хаарынан сытар.

Манна даҕатан эттэххэ, алтынньыга эмиэ Өлүөхүмэҕэ тэллэй үүммүтүн, ньээм-ньээм сибэккилээбитин туһунан саайтпытыгар суруйан турабыт.