ВИДЕО. Иэйиэхсит Хотуну муустан кыһан оҥордулар

Майа сэлиэнньэтин олохтооҕо, муус оҥоһуктарга аан дойду таһымнаах  маастар Архип Скрябин бу күннэргэ сахалыы халандаарынан 2025 сыл Айыытын – Иэйиэхсит Хотуну муустан кыһан оҥордо.

Үчүгэйкээн муус оҥоһук Мэҥэ Хаҥалас улууһун Хара нэһилиэгин “Айыллаан” култуура киинин биир бастыҥ киэргэлэ буолла.

Архип муустан скульптуралары оҥоруунан дьарыктаммыта сүүрбэччэ сыл буолбут. Аҕыйах хонуктааҕыта “Кыһын Саха сириттэн саҕаланар” бэстибээл чэрчитинэн куонкуруска кыттаннар, хаар оҥоһуктарга бастаабыттар, муус оҥоһукка анал аат ылбыттар. Былырыын Николай Петровтыын хаарга 2 миэстэ, муус оҥоһукка 1 м. ылбыт эбиттэр.

Архиптаах Николай ахсынньы 30 күнүгэр Кытай Харбин куоратыгар көтөөрү сылдьаллар. Онно тохсунньу 2 күнүттэн муус, хаар оҥоһуктарга аан дойдутааҕы куонкурус ыытыллыахтаах. Былырыын манна эмиэ кыттаннар, муус оҥоһуктарыгар 2 миэстэни ылбыттар, хаарга анал аакка тиксибиттэр.

“Саха сириттэн 5-6 хамаанда сайаапка биэрбит буолуохтаах, онтон талан ылаллар, — диир Архип. – Арассыыйа атын эрэгийиэннэрин кытта 5-6 хамаанда буолааччыбыт. Куонкуруска кытта Перуттан кытта кэлээччилэр”.