ВИДЕО: “Кэнникинэн оҕолор эрэпэтииссийэ хаһан буолар?” — диэн бэйэлэринэн ыйыталлар

Бу күннэргэ социальнай ситимнэринэн Өлүөнэ кытылын үрдүгэр, Дьоруойдар аллеяларыгар сэрии кэминээҕи таҥастаах эдэркээн кыргыттар, уолаттар вальстаан эргийэр видеолара дьон сэҥээриитин ылла, хараҕы үөртэ. Бу кимнээҕий?

Бу — Өлүөхүмэ тиэхиньикумун преподавателлэрэ, устудьуоннара. Үөрэх уонна билим министиэристибэтин сүбэтин тиэхиньикум дириэктэрэ Нина Михайлова иилэ хабан ылан, Бүтүн Арассыыйатааҕы “Кыайыы вальса” аахсыйаҕа кыттаары бүтэһик генеральнай эрэпэтииссийэлэриттэн ыыппыт видеолара эбит.

Тиэхиньикум преподавателэ Альбина Филиппова бэйэтэ төһө даҕаны биэс оҕолоох ийэ буоллар, үлэтиттэн, дьиэтээҕи түбүктэн быыс булан, вальсы туруорууга ылсыбыт. “Кыайыы вальсыгар” бэлэмнэнии кулун тутар саҥатыттан саҕаламмыта. Маҥнай алта паара устудьуон эрэ кыттар баҕалааҕа, эрэпэтииссийэҕэ кэлэрэ. Сыыйа оҕолор атыттары да, манна тиэхиньикумҥа үлэ быыһыгар көстүүмнэрбитин даҕаны тигэрбитин көрө-истэ сылдьан кыттыһан бардылар. Букатын куота сылдьыбыт дьон олус эппиэтинэстээх, эрэпэтииссийэни көтүппэт буолан хаалбыттарыттан бэйэбит да соһуйдубут: “Бүгүн эрэпэтииссийэ буолар дуо?” – диэн бэйэлэринэн кэлэн ыйыталаһаллар. Инньэ гынан барыта 20 паара (уонча преподаватель, отучча оҕо) кытынна.

Оччотооҕу Аҕа дойду Улуу сэриитин кэминээҕи курдук бытархай сибэккилээх, үҥкүүгэ сөп түбэһэрдии түөрт өҥнөөх, уһун сиэхтээх ырбаахыны булбаккабыт үлэһиттэр Дьокуускайга командировкаҕа барар кэмнэригэр сакаастаан аҕалтарбыппыт. Уонна үлэһиттэр дьиэбититтэн иистэнэр массыына аҕалан, биир хоһу быстах кэмҥэ ательеҕа кубулутан, байыаннай саппыкыга майгынныыр атахпыт таҥаһыгар тиийэ тиэхиньикумҥа үлэ быыһыгар киирэ-тахса, сүрүннээн киэһэтин тиктибит. Ким да туора турбата. Бу иннинэ маннык улахан тэрээһиҥҥэ кытта иликпит. Онон бэйэбит даҕаны үөрдүбүт” – диэн санаатын үллэстэр.

Аны саамай сүрүнэ, үөрүүлээҕэ баар – вальстааччыларга “Майский вальс” киэҥник биллибит ырыанан Өлүөхүмэ улууһун баһылыгын социальнай боппуруостарга солбуйааччы Оксана Саввинова доҕуһуоллаата. Куолаһа эчи кэрэтин! Киһи видеоны көрөөт да хараҕа тута ырыаһыкка хатанар. “Оксана Николаевна ыллыыр эбит дуу”, “Саҥа иһиттибит”, “Талаан кистэнэн сытар эбит” дэһээччилэр элбэхтэр. Толорооччу бэйэтэ бу курдук кэпсиир: “Аҕа дойду Улуу сэриитигэр Кыайыы 80 сылыгар аналлаах Бүтүн Арассыыйатааҕы “Кыайыы вальса” аахсыйаттан туора турбатыбыт. Өлүөхүмэ тиэхиньикумун преподавателлэрэ, үлэһиттэрэ улахан бэлэмнэнии үлэни ыыттылар. Оннооҕор тиэхиньикумҥа быстах кэмҥэ ателье үлэлээн ылла.

Оҕо эрдэхпиттэн ыллыырбын сөбүлүүбүн. Мин ыллыахпын сөп диэн санаабын биллэрбиппэр, тиэхиньикум дириэктэрэ Нина Михайлова, үҥкүүгэ бэлэмниир Альбина Филиппова тута өйөөбүттэрэ.  Киэҥ эйгэҕэ тахсыбат буолан, элбэх киһи истэн соһуйбут.

Бу бэлэмнэнэр үлэ барыта сүрүн үлэ кэнниттэн барда. Тиэхиньикум үлэһиттэрэ, устудьуоннар маладьыастар! Түгэнинэн туһанан “Майскай вальс”, “Ах, эти тучи в голубом” ырыа аудиозапиһын бэлэмнииргэ көмөлөспүт “Гармония” култуура киинин дириэктэригэр Алена Колмыгинаҕа, Илья Лопатинскайга туспа махталбын тириэрдэбин”  – диэн этэр.

Ити курдук Өлүөхүмэтээҕи тиэхиньикум оннооҕор 16 саастаах эдэркээн устудьуоннара, эдэр преподавателлэрэ Бүтүн Арассыыйатааҕы “Кыайыы вальса” аахсыйаҕа бэйэлэрэ баҕаран туран кыттыбыттар. Бүгүн Өлүөхүмэ куорат олохтоохторугар, ыалдьыттарыгар икки үҥкүүнү бэлэхтээри ох курдук оҥостон сылдьаллар. Устуоруйа тыыннаах, биһиги өйдүүрбүт тухары! Улуу Кыайыы 80 сылынан! Вальс видеотын манна көрүҥ.