ВИДЕО: «Кыайыы Факела» патриотическай сүүрүү марафона салҕанар

Саха сирин олохтооҕо Дмитрий Горохов көҕүлээһининэн тэриллибит «Кыайыы Факела» хамаанда патриотическай сүүрүү марафонун Саратов куораттан саҕалаабыта.

Патриотическай сүүрүү кыттыылаахтара дойду 16 куоратынан ааһаллар. Аахсыйа муус устар 24 күнүттэн ыам ыйын 11 күнүгэр диэри ыытыллар. Ол түмүгэр саха сирин спортсменнара уопсайа 1700 километр усталаах сиринэн сүүрэллэр. Эстиэпэтэ Саратов — Волгоград — Элиста — Ставрополь — Краснодар — Керчь — Симферополь — Севастополь маршрутунан ааһар уонна Аҕа дойду Улуу сэриитигэр Кыайыы 80 сылыгар ананар.

«Идиэйэбит өссө 1995 сыллаахха үөскээбитэ. Биэс сыл устата биһиги дойду атын эрэгийиэннэригэр маннык сүүрүүлэри ыытабыт. Дьон-сэргэ биһиги көҕүлээһиммитин сэргииллэр», — диэн кэпсиир бөлөх хамандыыра Дмитрий Горохов.

«Нам улууһуттан Яна Егорова СӨ дэлэгээссийэтин састаабыгар киирэн дойду 16 куораттарынан «Кыайыы Факела» сүүрүү аахсыйатыгар кыттар. Яна Юрьевнаны эҕэрдэлиибит, инникитин да ситиһиилэри баҕарабыт», — диэн “Нам” улууһун дьаһалтатын пресс-сулууспата суруйар.