ВИДЕО: «Манчаары оонньууларын» өрөгөй ырыата сүрэхтэннэ
Бу күннэргэ Дьулустаан Толстяков тылыгар уонна Ариана Решетникова мелодиятыгар, Михаил Варламов аранжировкатыгар «Манчаары оонньууларын» өрөгөй ырыата сүрэхтэннэ. Өрөгөй ырыатын эр дьон «Өрөгөй» ансаамбыла толорор.
Санаттахха, куоластааһын түмүгүнэн «Манчаары оонньууларын» мелодия бырайыагар кыайыылааҕынан «Айар уустар» Дьокуускайдааҕы креативнай индустрия кэллиэһин бастакы кууруһун устудьуона Ариана Решетникова буолбута, оттон бастыҥ тиэкис ааптарынан «ОДО» этно- комплекс дириэктэрин солбуйааччыта Дьулустаан Толстяков ааттаммыта. Иккиэн кыайыылаахтар 20 000 солк. суумалаах дипломнарынан уонна уу харчынан бириэмийэлэри туппуттара.
Дьулустаан Толстяков
Сайыммытын уруйдаан
Тоҕуоруһа мустаммыт,
Бастыҥ дьону быһаарар
Түһүлгэҕэ киирдибит.
Үйэлээх үгэс буолбут
Норуот таптыыр күрэһэ
Манчаары оонньуулара
Саха омук сүрэҕэр.
Хос ырыата:
Номох буолбут убайбыт
Сүдү-сүҥкэн кылаата
Манчаары оонньуулара
Саха күрэһин чыпчаала
Кэрэ куону сырсаннар
Сүүрүүктэр түһүннүлэр,
Мас тардыһыы, хапсаҕай,
Соноҕостор көттүлэр.
Саха дьонун бастыҥа
Манчаарыны уруйдаан,
Маннык үрдүк таһымҥа
Кыайыылааҕы айхаллаан!
Сообщить об опечатке
Текст, который будет отправлен нашим редакторам: