ВИДЕО: «Манчаары оонньууларын» күрэхтэһиилэрэ саҕаланнылар

Бүгүн сарсыардаттан күрэс түөрт араас көрүҥэр уоттаах-күөстээх күрэхтэһии салҕанан бара турар.

Ол курдук, А.Е.Турнин аатынан күрэс уораҕайа күрэхтэһээччилэринэн, көрөөччүлэринэн оргуйан олорор. Манна хотугу дэгит күрэскэ — үстэ төхтүрүйэн ыстаныыга, уопсайа 80 күрэсчит илин-кэлин түсүһэр. Улуустар ох курдук оҥостон, кустук курдук куоһанан, инники күөҥҥэ уһулуччу ойон тахсардыы оҥостон, туттан-хаптан кэлбиттэр.

Киэҥ-куоҥ саалаҕа кэккэлэһэ гиирэ күрэһэ ыытылла турар. Күүһү, тулууру, дьулууру эрэйэр күрэс бүгүн, сарсын ыытыллар. Маны таһынан, манна буулдьанан ытыыга «Куропатка ВПп», (хамаанданан), “Белка-ВПп (микс)» күрэхтэһиэхтэрэ.

Маны таһынан, А.Е.Мординов аатынан лиссиэй былаһааккатыгар төрүт оҕунан ытыыга («Куобах», «Кус») күөн күрэс ыытылла турар. Кыраҕы харахтаахтар 16 улуустан түмсүбүттэр. Хас биирдии хамаанда алталыы киһилээх.

Горнай улууһуттан кэлбит хамаандаттан тириэньэр Иоганн Михайловы көрсөн санаатын ыйытыластым.

Видео, хаартыска: ааптар