ВИДЕО. Массыыналарынан саамай улахан харыйа ойууланна

Челябинскай уобалас Калачево аэродромугар суоппардар 200 массыынанан харыйа ойуулаатылар.

Саҥа дьыллааҕы харыйаны олохтоохтор видеоҕа үөһэттэн уһулан социальнай ситимнэринэн бу сыл ахсынньы 25 күнүгэр тарҕаттылар.

«Бу аптаах кыһыҥҥы киэһэҕэ биһиги Саҥа дьыллааҕы «Автоелка-2025» диэн флешмобы биллэрэбит», — диэн ВКонтакте «АвтоДвиж Миасс» бөлөх кыттааччылара суруйдулар. Видеоҕа 200 массыынаттан турар сүдү улахан харыйа көстөр уонна уота-күөһэ көрөөчүлэргэ ураты алыптаах санааны эбэн биэрэр.

Саамай улахан харыйаны аэродром балаһатыгар ойуулуурга бары баҕалаах суоппары ыҥырбыттар. Бу көрсүһүү — билиҥҥи кэм  массыынанан аныгы шоу буолар. Манна хас биирдии киһи кыттарыгар кыах бэриллиннэ, диэн тэрийээччилэр кэпсээтилэр.