ВИДЕО: Мииринэйгэ як оҕото госинспекторы кытта доҕордоспут

Мииринэйгэ баар «Живые алмазы Якутии» айылҕа пааркатыгар кулун тутар 23 күнүгэр кылбаа маҥан як төрөөбүтэ. Кинини Марта диэн сүрэхтээбиттэрэ. Ый иһигэр як улааппыт, аны билигин паарка госинспекторын аттыттан арахпат буолбут. Бу туһунан биологическай ресурсалар, харыстанар сирдэр уонна пааркалар дириэксийэтэ СИА-ҕа иһитиннэрбит.

Марта төрөөтүн кытта инспектордар дьиэлэригэр көһөрбүттэрэ. Кини ийэтэ үүтэ суох буолан, инспектордар аһатан-сиэтэн, көрөн-истэн олороллор.

Паарка учаастактааҕы инспектора Александр Михайлов як оҕотугар аҕатын кэриэтэ буолла. Оҕусчаан киниттэн  хардыы да сири арахпат, убаммыт аҕай эбит.

Маартаны коза үүтүнэн аһаталлар, билиҥҥитэ оту сатаан сиэбэт.

Кинини улаата түспүтүн кэнниттэн атын оҕустарга илдьиэхтэрэ.

Видео: Влада Александрова