ВИДЕО: «Муус Устар» былааҕа Тиксиигэ күөрэйдэ

Арассыыйа саамай уһук сиригэр — Хотугу муора пуордугар – Булуҥ улууһун Тиксии бөһүөлэгэр «Муус Устар» V үбүлүөйдээх ыччат бэстибээлин былааҕа күөрэйдэ.

Бу күн Арктика бөһүөлэгэр сөкүүндэҕэ 30 м. диэри түргэннээх күүстээх тыал түспүтэ биллэр. Булуҥ оройуона иккитэ -2023 уонна 2024 сылларга — Арктика оройуоннарын ортотугар «Бастыҥ ыччат оройуона» анал номинация кыайыылааҕынан буолбута.

«Муус Устар» ыччат бэстибээл Саха сиригэр 2021 сылтан ыытыллар. Быйыл бэһис төгүлүн буолар. Дойду Бэрэсидьиэнэ Владимир Путин бэлиэтээбитинэн, бэстибээл Саха сирин култуурунай, уопсастыбаннай олоҕор үтүө үгэскэ кубулуйан, уолаттарга уонна кыргыттарга айар-тутар эйгэтин араас хайысхатыгар бэйэлэрин талааннарын көрдөрөллөрүгэр кыах биэрэр.

Ил Дархан Айсен Николаев этэринэн, «Муус Устар» Саха сирин визитнэй карточката. Бэстибээл ыччаты түмэр уонна эрэгийэн сайдарыгар саҥа кыахтары биэрэр. Бэстибээл тэрийээччилэрэ – СӨ Бырабыыталыстыбата уонна генеральнай спонсор «Эльга» хампаанньа.