ВИДЕО. Ньурба улууһун сүүрбэччэ нэһилиэгин бэлиэлэрин куукулаларынан билиһиннэрдилэр

Быйылгы «Якутия мастеровая» быыстапкаҕа улуустарга туспа сааланы анаабыт буолан, кыттааччылар да, көрөөччүлэр да кимниин да ыксыаласпакка, олохтоохтук оҥостон тэрээһиҥҥэ кыттыыны ыллылар.

Ньурба улууһуттан сылдьар дэлэгээссийэ бары нэһилиэктэртэн  кыһыҥҥы сон арааһыттан куукула оҥоһукка тиийэ хомуйан аҕалбыттар.

Ол курдук, «Сыахай эйгэтэ» түмсүү салайааччыта Галина Федорова 19 нэһилиэктэн хомуйан аҕалбыт куукуланан дьүһүйүү быыстапкатын билиһиннэрдэ.

Хас биирдии нэһилиэк бэйэтин сирэйдиир бэлиэлэринэн куукула оҥорбуттар эбит. Холобура, Чаппанда тииҥэ, Ньурбачаан эмис собото, Ынахсыт ынах сүөһүтэ. Ити курдук, сүүрбэччэ нэһилиэги барытын ааттыы туруохха сөп.

Быйыл үгүс улуус куукула оҥоһуктары аҕалбыт. Кэрэхсэбиллээҕэ баар, бары оҥоһуктар туох эрэ дириҥ ис хоһоонноохтор. Нууччалыы эттэххэ, киинэ сюжетыгар, майгынныыр курдук. Онон сотору кэминэн куукула оҥорооччулар өрөспүүбүлүкэтээҕи бэстибээллэрин ыытарга уолдьаспыт.