Хаартыкса: социальнай ситимнэртэн
«Дорообо Тускулаана! Ньурбаҕа реабилитационнай кииҥҥэ сылдьан видео устан, иһитиннэриини ылан бөлөххө угарыҥ буоллар. Элбэх дьон көрөн, оҕолорун эмтэтэ, сынньата илдьиэхтэр эттэ. Мин кыыһым онно эмтэнэ сынньана сытар усулуобуйа отой үчүгэй», — диэн социальнай ситимнэринэн илдьит кэлээтин кытта, Ньурбаҕа сылдьар киһи тутатына тэрилтэҕэ эрийдим. Өрөбүл күн Валентина Иванова — реабилитационнай киин үлэһитэ олус үчүгэйдик көрсөн, тэрилтэ дьиэтигэр тиийэн толору билиһиннэрдэ.
Ньурбатааҕы дьиэ кэргэҥҥэ уонна оҕоҕо көмө буолар кэлим киин аан бастаан 1998 сыллаахха Нерюнгритааҕы реабилитационной киин салаатын быһыытынан аһыллыбыта. Онтон 2004 сыллаахха туспа киин быһыытынан үлэлээн 2008 сыллаахха уопсай дьиэни өрөмүөннээн киирэллэр, онтон 2018 сылга саҥа куорпус эбии тутуллар. 2021 сылтан «Арчы» тэрилтэни кытта холбоһон оҕону чэбдигирдэр, дьиэ кэргэҥҥэ көмө буолар үлүгэрдээх үлэни ыыталлар. Манна Бүлүү түбэтин улуустарын уонна Дьокуускай куораттан доруобуйаларынан хааччахтаах, ону кытта анал байыаннай дьайыы кыттыылаахтарын оҕолоро (4-18 саастаахтар, эһээхэй оҕолор төрөппүттэринээн) эмтэнэллэр, чэбдигирэллэр. Иккис мэндиэмэҥҥэ олох ыарахан түгэнигэр түбэспит дьиэ кэргэттэргэ көмө буолаллар.
Кииҥҥэ киирээтин кытта оҕолор сынньанар хосторо, олус минньигэс астаах остолобуой, массаж хоһо. Бүлүү бөлөх улуустарыттан биир бастакынан оҥоһуллубут туус хоһо. Иккис мэндиэмэҥҥэ ЛФК, логопед, психолог, дефектолог, сурдопедагог, быраастар, үлэһиттэр хосторо бааллар. Хас биирдии хос анал оборудованиянан хааччыллан оҕо сайдыытыгар көмө буолар. Былырыын Тимченко пуондатыгар Үлэ министиэристибэтин кытта граҥҥа кыттан, кыайан, оборудования арааһын ылбыттар, ол иһигэр логопед хоппото кытта баар.
Бу тэриллэринэн дьиэттэн кыайан кэлэн эмтэммэт оҕолорго көмө буолаллар. Чэбдигирдэр киин сатаан саҥарбат, бытаан сайдыылаах оҕолорго көмөлөһөр, элбэх дьон махталын ылар. Бүлүү улуустара чугастыы Ньурба киинигэр оҕолору чэбдигирдиэххэ сөп эбит, сыл устата 17 төгүл 30-туу оҕону чэбдигирдэллэр. Реабилитационнай киин сыралаах үлэтин, оҕону сайыннарар араас ньымаларын олус элбэх төрөппүт сэргиир эбит. Арба, Сунтаартан Ян Вячеславович Павлов физиотерапевынан үлэлиирин иһиттим. Тэрилтэ 57 үлэһиттээх, салайааччы Марианна Васильевна Алексеева. Үлэҕитигэр махтал, өссө да сайда-үүнэ туруҥ! Билсэр төл: 89241608691 (Ефросинья Анатольевна).
Тускулаана Горохова-Кобельянова
Саха сиригэр 9514 оҕо төрөөтө. Саха Өрөспүүбүлүкэтэ 2014 сылтан нэһилиэнньэ ахсаана үрдүү турар Уһук Илин…
Саха сирэ хорсун-хоодуот дьонунан аатырар. Саха сирэ бэйэтин устуоруйатыгар элбэх дьоруойу бэлэхтээбитэ, олор истэригэр Аҕа…
Хата бу бэрт этии буолбут. Билигин киһиэхэ ханнык битэмиин тиийбэтин бэрэбиэркэлэтээри дьон хастыы да тыһыынчаны…
Мииринэй оройуонун суута Ленскэй оройуонун 39 саастаах олохтооҕун улахан уорууга буруйдаата. Буруйдаах киһи тралга суоппардаабыт…
Мэҥэ Хаҥалас улууһун Төҥүлү нэһилиэгин урбаанньыта Иван Иванович Борисов туһунан “Саха сирэ” хаһыат саайтын нөҥүө…
Аҕыс уон сыл анараа өттүгэр, аан дойдуну аймаабыт, харах уута тохтуулаах Аҕа дойду Улуу сэриитэ…