ВИДЕО: Оҕону иитэ ылар дьиэ кэргэн Саина, Сергей Григорьевтар Аан дойдутааҕы дьахталлар күннэринэн ырыанан эҕэрдэлииллэр

Уус Алдан улууһун Бэйдиҥэ сэлиэнньэтин олохтоохторо, оҕо иитэр дьиэ кэргэн Саина, Сергей Григорьевтар Оҕо саас сылын сааскы маҥнайгы бырааһынньыгынан — сырдык, ыраас Аан дойдутааҕы дьахталлар күннэринэн элбэх оҕолоох ыалларга бэйэлэрин ырыанан эҕэрдэлэрин бэлэх ууналлар.   

Ыал ийэтэ Саина Егоровнаттан кылгастык ийэлээх аҕа ырыаҕы сыстыыларын, бырааһынньыгы хайдах атааралларын туһунан ыйыталаспыппар маннык кэпсээтэ: “Мин оскуолаҕа үөрэнэр сылларбыттан ыллыыбын, үксүн туойабын, кылыһахтыҥы куоластаахпын. Кэргэним Сергей Сергеевич оскуоланы бүтэрэн баран ыллыыр буолбут. Нэһилиэкпитигэр ыытыллар кэнсиэрдэргэ кыттааччыбыт. Иккиэн бииргэ толорор бу эрэ ырыалаахпыт, уоннааҕыларын тус-туспа толоробут. “Сыл дьиэ кэргэнэ” куонкуруска кыттарбытыгар ыллаабыппыт.

Оҕолорбут эмиэ ыллыыллар, улахан уолбут Сима 7-с кылааска үөрэнэр сылыгар “Эн — сулускун” тэлэбиисэринэн бырайыакка кыттан турардаах. Ини-бии кыра уолаттарбыт эмиэ ыллыыллар, араас куонкурустарга кытталлар.

Аан дойдутааҕы дьахталлар күннэригэр хас биирдии ыал курдук бары саба түһэн бырааһынньыктааҕы остуолу хайаан даҕаны тардабыт, бэйэ-бэйэбитин эҕэрдэлэһэбит. Аҕабыт сыллата тутуһар биир үгэстээх – сааскы маҥнайгы бырааһынньыгынан кыргыттарыгар хайаан даҕаны сибэкки бэлэхтиир.

Сахабыт сирин бары кэрэ аҥардарын кэлэн иһэр сааскы бырааһынньыгынан биһиги дьиэ кэргэн аатыттан эҕэрдэлиибит. Кытаанах доруобуйаны, эйэлээх халлааны баҕарабыт”, — диэн эҕэрдэтин тириэрдэр.

Григорьевтар нэһилиэк, улуус, өрөспүүбүлүкэ биир киэн туттар ыала. Хас биирдии оҕону көрөн-истэн, бэрийэн, болҕомто ууран, хаһаайыстыбаларын көрөн хаһан быыс булан өрөөспүбүлүкэ уопсастыбаннай олоҕор, тэрээһиннэргэ тиийэ кытталларын сөҕөбүт, киэн туттабыт. Биир үчүгэйэ диэн, ханна баҕарар — үлэҕэ, үөрэххэ, сынньалаҥҥа оҕолорун кытта өрүү бииргэ тутуспутунан сылдьар олоххо көхтөөх, кэрэни, үтүөнү бэлиэтии көрөр дьон.