ВИДЕО: Ойуур камератыгар саһыл хабылынна

Айылҕа ураты харыстанар сирдэригэр дьиикэй кыыллары, үүнээйилэри, эбэтэр атын да уларыйыылары кэтээн көрөргө хаартыскаҕа түһэрэр тэриллэри, ол эбэтэр камера-ловушкалары туруораллар. Айылҕа харыстабылын иниспиэктэрдэрэ үксүн кыыл-сүөл ахсаанын үөрэтэргэ уонна айылҕа усулуобуйатын хонтуруоллуурга тутталлар.

Нам улууһунааҕы айылҕа ураты харыстанар сирин управлениетын үлэһиттэрэ ойуурга туруоруллубут камера-ловушкалартан дөрүн-дөрүн хаартыскалары таһаараллар. Бу сырыыга объектив ойуур устун сэрэхтээхтик хааман иһэр саһылы туппут диэн Биологическай ресурсалар, айылҕа ураты харыстанар сирдэрин уонна пааркаларын дириэксийэтэ иһитиннэрэр. Үөмэн-чүөмэн үктэнэн иһэр саһыл эмискэ, туохтан эрэ куттаммыт курдук, түргэн үлүгэрдик туора ыстанара көстөр.