ВИДЕО: Олоҥхо ыһыаҕар тайах кэлэн ыалдьыттаата

Аммаҕа Олоҥхо ыһыаҕын кэмигэр, Эмис нэһилиэгин Саппыйа алааһыгар айылҕа маанылаах оҕото — тайах тахсан, көлүйэҕэ киирэн уулаата, алаас устун хаамыталаан дьыралдыйда.

Мустубут дьон сөҕөн-махтайан, хаартыскаҕа хатаатылар, видеоҕа түһэрэн үйэтиттилэр.

Эмис нэһилиэгэ Амма улууһун бастакы нэһилиэгэ буоларынан, Саппыйа алааска ыалдьыттары бастакынан көрсөр. Бу алааска саха норуодунай суруйааччыта, олоҥхоһут Күннүк Уурастыырап төрөөбүтэ. Манна кини дьонун ампаардара, ураты туруктаах түмэл баар.

Эмис дьоно-сэргэтэ ыалдьыттары алаадьынан, быыппаҕынан айах тутан көрсөллөр. Өссө биир бэлэҕинэн тайҕа сэдэх кыыла бэйэтинэн кэлэн, көстүбүтэ буолар.

Видео: социальнай ситимтэн