ВИДЕО. Оскуола үөрэнээччилэрэ байыастарга анаан собону кэнсиэрбэлээтилэр

Бу күннэргэ Сунтаар улууһун Күндэйэтээҕи агро хайысхалаах оскуола үөрэнээччилэрэ байыастарга анаан собону кэнсиэрбэлээн бэлэмнээтилэр.

Байыаннай дьайыыга гуманитарнай көмөнү хомуйар пууҥҥа күн ахсын наадалаах малы-салы, аһы-үөлү хомуйаллар. Бу сырыыга Күндэйэ агро хайысхалаах оскуола үөрэнээччилэрэ кэнсиэрбэлэммит собону 11 дьааһыкка уган аҕаллылар. Барытын бэйэлэрэ астаабыттар. Оҕолор балыктарын ыаллартан хомуйан, нэһилиэккэ муҥха тэрийэн, бэйэлэрэ астаан-үөллээн «Тускул» ХЭУо оҥорон таһаарар сыахха автоклав оһоххо буһардылар. Маннык үтүө бачыымы тутуһан, үлэлэрин салгыыр былааннаахтар. Оскуолаҕа иһинэн научнай үлэни тэрийэр уопсастыба аһыллан үлэлиир. Итиннэ оҕолор эти-үүтү чинчийэн, оҕуруот аһын үүнүүтүн көрөн-истэн, аны балыгы кэнсиэрбэлиэхпитин баҕарабыт диэн саҥа бырайыак үлэлэттилэр. Барыта 10 уол, 5 кыыс үөрэнэр кылаас оҕолоро байыаннай дьайыыга көмө буоларга турунан, күүскэ үлэлээн, барыта 105 киилэ ыйааһыннаах 188 устуука балык кэнсиэрбэтэ бэлэмнэннэ. Бу туһунан Сунтаар улууһун дьаһалтатын пресс-сулууспата суруйар.

Күндэйэтээҕи агро хайысхалаах оскуола эбии үөрэхтээһинин маастара Юлия Дьяконова сиһилии кэпсиир:

«Бастаан оҕолорго тыл көхөхпүппэр бары сэргэхсийэ түстүлэр. Бары үлэлиибит диэтилэр уонна саҕалаан киирэн бардыбыт. Бөһүөлэги биир гына сүүрэ сылдьан оҕолорбут собо хомуйдулар, төрөппүттэр үөрэ-көтө балыктары ыраастан биэрдилэр. Онтон оҕолорбут балык кэнсиэрбэтин хаалаатылар. Манна «Тускул» ХЭУо  барытын буһарда уонна бэлэмнээн биэрдэ. Нэһилиэгинэн бүттүүн үлэ ыытылынна».