Полицейскайдар маҕаһыынтан тиэхиньикэни уорбут үс киһини туттулар

ИДьМ сулууспатын «Дьокуускайдааҕы» 4-с №-дээх полиция отделын дьуһуурунай чааһыгар маҕаһыын бэрэстэбиитэлэ сайабылыанньана суруйбут.

Кини атыы-эргиэн кииниттэн биллибэт дьон табаары уоран илдьэ барбыттарын туһунан иһитиннэрбит. Суһал-ирдиир тэрээһиннэр кэмигэр холуобунай ирдэбил үлэһиттэрэ үс олохтоох киһини туппуттар. Кинилэр 38-с саастаах икки эр киһи (биирдэстэрэ урут сууттаммыт) уонна 30 саастаах дьахтар буолаллара биллибит. Бу туһунан Саха сиринээҕи ИДьМ пресс-сулууспата иһитиннэрэр.

Силиэстийэҕэ быһаарыллыбытынан, ол күн уорбаланааччылар баарга арыгы иһэ олорбуттар. Харчылара бүппүтүгэр, хаһаайыстыбаннай маҕаһыынтан табаар уорарга быһаарыммыттар. Буруйу оҥорооччулар атыы-эргиэн саалатыгар сылдьан, хобордоох, икки отпариватель уонна өтүүк уорбуттар. Табаардары үрүксээктэригэр уктан маҕаһыынтан тахсан барбыттар. Уоруллубут электроприбордары буруйдаахтар ааһан иһэр дьоҥҥо 500-түү солкуобайга атыылаан, харчыларынан арыгы атыыласпыттар. Ол кэннэ уорбаланааччылар эмиэ ити маҕаһыыҥҥа иккиһин киирэн тутуллубуттар. Кинилэргэ РФ Холуобунай кодексатын 158-с ыстатыйатын 2-с чааһынан («Уоруу») холуобунай дьыала тэрилиннэ. Бу ыстатыйанан буруйдаахтар 5 сылга диэри көҥүллэрэ быһыллыан сөп.