ВИДЕО: полиглот омук уола сахалыы саҥарарга ыҥырар

Социальнай ситимнэринэн хата биир үчүгэй сонун тарҕанна. Полиглот омук уола саха тылын сэргээн, иннин-кэннин быһаарсан, атыы-кутуу бөҕө буола турарын видеоҕа устубуттар. Бу уол саха тылын үөрэтэбин уонна сахалыы кэмиэдьийэ киинэҕэ оонньуур баҕа санаалахпын диэн санаатын үллэстибит.

24 саастаах Узбек уола Дьокуускай куоракка 16 сылын олорор, саха тылын баҕатынан үөрэтэн, кыһалҕата суох өйдүүр уонна саҥарар эбит.

«Нөрүөн-Нөргүй! Мин аатым Оятилло диэн.  Табаарыстарым бары сахалар. Түүр омук тыллара уонна саха тыла майгыннаһаллар, онон үөрэтэргэ чэпчэки. Саха тылын кыратык өйдүүр буоламмын, сахалыы кэмиэдьийэ киинэтигэр оонньуур баҕа санаалаахпын. Төрүкү кэмиэдьийэҕэ эрэ уһулларга баҕарабын, тоҕо диэн мин уол оҕото моҕотой буоллаҕым. Кыргыттар уонна уолаттар бэйэҕит төрөөбүт тылгытын уонна култуураҕытын умнумаҥ. Ханнык эмэ атын омук тылын үөрэтэр санаалаах буоллаххытына, бастатан туран бэйэҕит төрөөбүт тылгытын үөрэтэргэ дьулуһуҥ. Саха тылын үөрэт!», — диэн Оятилло Тешебаев баҕа санаатын тиэртэ.

«Оннооҕор бэйэбит оҕолорбут маннык саҥарбаттар» диэн атыылаһааччылар сөҕөллөр.

«Билигин мин пааркаҕа мороженай атыылыыбын. Паарка үлэһиттэрэ уонна атыылаһааччыларым сахалыы саҥараҕын диэн мэлдьи хайҕыыллар. Ханна да сырыттым сахалар наар үөрэллэр уонна олус үчүгэйдик, бэйэлэрин оҕолоругар курдук сыһыаннаһаллар», — диир кини.

Оятиллоны пааркаҕа үлэлии сырыттаҕына блогер Уйгулаана Николаева («Say saqa» бырайыак) таба көрөн, билсиһэн, киэҥ куйаарга таһаарбыта.

Билиҥҥи саха ыччата сайдыылаах, билиитэ-көрүүтэ, аан дойдуну анаарыыта киэҥ эбит буоллаҕына, кэнники кэмҥэ сахалыы саҥарартан кыбыстар, туттунар буолбутун аҕам саастаах дьон сонньуйа истэн, олус хомойоллорун туһунан суруйаллар. Ол да буоллар, саха тылыгар интэриэс улаатар. Тыл бэлиитикэтигэр киэҥ хабааннаах үлэ барар. Бырабыыталыстыба, Ил Түмэн дьокутааттара төөрбүт тылбытын харыстааһыҥҥа, үөрэтиигэ, сайыннарыыга, киэҥ эйгэҕэ таһаарыыга хото үлэлэһэллэр.

Видео*: saysaqa бөлөхтөн.

*-«Facebook/Instagram — Meta Platforms Inc. бырайыага — Арассыыйаҕа бобуулаах».