ВИДЕО: Саха сирин күөллэригэр – динозавр саастыылаах харамайдар

Саха сирин балыксыта күөлгэ тууга дьикти харамайдары булбут. Бу динозаврдарга холоотоххо, ол кэмтэн ордон хаалбыт аҕыйах ахсааннаах харамайдартан биирдэстэрэ.

«Эбэҕэ киирэн туубун көрдүм. Онтум барыта атын харамай уонна уон устуука мунду. Чэ буоллун, кууруссалар сиэхтэрэ» — диэн балыксыт сонньуйбуттуу кэмэнтээрийдиир.

Щитеньнэри дьиҥнээх түҥ былыргы тыыннаах харамайынан ааҕыахха сөп. Кинилэр Сиргэ динозаврдааҕар быдан эрдэ үөскээбит былыргы харамайдартан биирдэстэрэ буолаллар. Бу араактыҥылар кытаанах куйаҕынан бүрүллүбүттэр. Харамай латыынныы аата Triops (гириэктии «үс харахтаах» диэнтэн) — үһүс хараҕы санатар уорганнаахтарын иһин ааттаабыттар. Бу уоргана билиҥҥэ диэри кини тугу гынара чопчу быһаарылла илик.

Видеону соторутааҕыта «Охота и рыбалка» ТГ-ханаалга балыксыт устубут щитеньнэрдээх видеотын таһаарда. Учуонай этэринэн, щитеньнэр үксүн уу кытыытыгар, чычаас сиргэ, бөлөхтөспөккө, биир тэҥник тарҕаналлар. Кинилэр тохтоло суох хамсыыллар, уу түгэҕэр түһэллэр-тахсаллар. Тугу эмэ буллахтарына, тута саба түһэн сиэн кэбиһэллэр. Ол гынан баран, тыыннаах, көҥүл устан иһэр балыкка сыстыбаттар.