ВИДЕО: Саха сирин кыраныыссатыгар суолга эһэ киһини эккирэттэ

Исписэлиистэр этэллэринэн, эһэлэр урут-уруккуттан дьоҥҥо саба түһэллэрэ, билигин үйэ сайдан, төлөпүөҥҥэ тута устан тарҕатар буоланнар, саба түһүү элбээбит курдук.

Бүгүн, бэс ыйын 16 күнүгэр, социальнай ситимнэринэн Амурскай уобалас уонна Саха сирин кыраныыссатыгар эр киһини тыатааҕы эккирэтэр видеота тарҕанна. Эһэ дьонтон куттаммат, хата ол оннугар дьону эккирэтэр эбит.

Тыатааҕы мэнээктээбит кэмигэр тыаҕа соҕотохтуу сылдьар сэрэхтээх. Сир астыы, тэллэйдии сылдьан түбэһиэххэ сөп. Ол иһин тыаҕа тыастаахтык, саҥара-иҥэрэ, төһө кыалларынан, элбэх буолан сылдьар ордук. Тыатааҕыга аһыыр усулуобуйаны оҥоруо суохтаахпыт, ол туһуттан ас тобоҕун мээнэ ыһар, быраҕаттыыр табыллыбат. Ону сэргэ, уһун оттоох, халыҥ тыалаах сиртэн тэйэ туттуҥ. Ханнык да түгэҥҥэ, охтубут сылгы, туртас өлүгүттэн, сэмнэхтэн тэйэ туттуҥ. Тыатааҕыга хаһан даҕаны көхсүгүтүн көрдөрүмэҥ. Суолга тахсыбыт кыылы аһатарга дьулуһумаҥ. Тыаҕа өрүү бэйэҕитин кытта биэрэстээх ыстарар тэрили (фальшфейер), тыаһыыр-ууһуур сиренаны илдьэ сылдьыҥ.