ВИДЕО: Саха сирин оскуолаларыгар тиһэх чуораан чугдаарда

Ыам ыйын 24 күнүгэр, дойду үрдүнэн биир кэлим тиһэх чуораан күнүгэр, Саха сирин бары оскуолаларыгар бүтэһик чуораан чугдаарда.

Дьокуускай куорат 31№-дээх оскуолатын тиһэх чуорааныгар үөрэх министиирэ Нюргуна Соколова кытынна. Үөрэҕи быйыл 144 выпускник түмүктээтэ. Өрөгөйдөөх, долгутуулаах тэрээһиҥҥэ учууталларга, төрөппүттэргэ, выпускниктарга үгүс махтал тыллара этилиннилэр.

Үөрэх уонна билим миниистирэ Нюргуна Соколова иһитиннэрбитинэн, Саха сирин үрдүнэн тиһэх чуораан 8 тыһыынчаттан тахса 11 кылаас уонна 15 тыһыынча 9 кылаас үөрэнээччилэригэр тыаһаата.

«Биһиги судаарыстыбабыт оҕолор оскуолаҕа хаачыстыбалаах үөрэҕи ылалларыгар хайысхалаах үлэлиир. Итиниэхэ дойдуга национальнай бырайыактар, судаарыстыбаннай бырагыраамалар олоххо киирэллэр. Быйыл өрөспүүбүлүкэ бары оскуолалара Ийэ дойду көмүскэлигэр анаммыт аныгы кабинеттарынан хааччыллыахтара, онтон эһиил «Ыччат уонна оҕо» национальнай бырайыак чэрчитинэн муусука уонна физика кабинеттара тэриллиэхтэрэ. Бу бэлиэ күҥҥэ биһиги выпускниктары олоххо бэлэмнээх буоларга уһуйбут учууталларга махтал тылларбытын этэбит. Выпускниктарга  аттестаты ыларгытыгар уонна баҕарбыт идэҕитин баһылыыргытыгар баҕарабын», — диэтэ Нюргуна Соколова.