ВИДЕО: Саха сирин танкиһа билиэнтэн куотан баран, утарсааччытын бэйэтин билиэҥҥэ ылбыт

Мииринэйтэн байыаннай дьайыыга барбыт танкист ВСУ саллаатын охсуһан кыайан, билиэнтэн нэһиилэ куотан баран, утарсааччытын бэйэтин билиэҥҥэ ылбыт. Бу туһунан Макс диэн позывнойдаах Т-80 БВМ суоппар-мэхээньигэ  Zvezdanews-ка кэпсээбит.

Бу быһылаан Донецкай норуодунай өрөспүүбүлүкэ Скудное диэн бөһүөлэгин иһин киирсии кэмигэр буолбут. Арассыыйа тааҥката миинэни түбэспит. Экипаж өстөөхтөн саһарга күһэллибит. Макс дроннартан куотан, сууллаары турар дьиэҕэ киирбит. Онуоха онно кини Украина аптамааттаах саллаатыгар түбэспит.

Өстөөх саллаата тута хамандыырыгар Арассыыйа саллаатын билиэн ылбытын, салгыы тугу гынарын туһунан ыйыппыт. «Боппуруоһу бэйэҥ быһаар» диэн хоруй кэлбит.

«Кини миэхэ барарбын көҥүллээбитэ, ол эрээри хараҕар көхсүгэ ытыам диэн сурулла сылдьара. Иккитэ ыта сатаабыта, аптамаата харан хаалбыта. Мин бүтэһиктээх кыаҕы туһаннахпына сатанарын өйдөөбүтүм», — диэн Макс кэпсиир.

Ол кэнниттэн Макс анараа саллаат диэки сиртэн бетон үлтүркэйин ылан бырахпыт. Аптамаатыттан аралдьыйбыт кэмигэр, дьэ, үрдүгэр түспүт. Охсуһуу саҕаламмыт, анараа киһи биһиги танкиспытынааҕар быдан бөдөҥ эбит. Уонча сыл Мииринэй шаахталарыгар үлэлээбит саллаат утарсааччытын баһыйан, бэйэтин билиэҥҥэ ылбыт.