ВИДЕО: Сайсары күөлгэ хаайтарбыт кустар дьылҕалара олохтоохтору долгутар

Дьокуускайга Сайсары күөл мууһа халыҥаан, онно хаалбыт кустар хас да хонук устата дьон болҕомтотун тардар. Күн аайы күөл мууһунан бүрүллэн, көтөрдөр мууска хаайтарбыттарын куорат олохтоохторо долгуйа кэтииллэр.

Социальнай ситимнэринэн ичигэс дойдуга көппөккө хаалбыт кустар хаартыскалара уонна видеолара киэҥник тарҕанар. Сайсары күөлгэ хаалбыт кустар соҕуруу барар санаалара суох курдук.

Бу иннинэ Экология министиэристибэтэ олохтоохторго туһаайан маннык иһитиннэриини таһаарбыта: «Айылҕа сокуонугар орооспот наадаттан, кустары аһатары тохтоторгутугар ыҥырабыт». Биэдэмистибэ санаппытынан, исписэлиистэр көтөрдөрү харыстыырга сөптөөх дьаһаллары ылыныахтара.