Хаартысканы Марта Николаева тиксэрдэ
Саха сиригэр киэҥник биллэр шоумен, Кэбээйи улууһун бочуоттаах олохтооҕо, махталынан эрэ ахтыллар Клим Федоров үс күннээх тууругар, 15 араа-бараа саастаах дьон түбэһэн сынньанныбыт.
Күөх сайыммыт үтүө күннэрин баттаһа, Клим Семенович тэрийэр тууругар Амма улууһун Бөтүҥ нэһилиэгэр тахсан клипкэ уһулуннубут, Килиим алгыстаах сарсыардааҥҥы чэбдигирдэр сэрээккэтигэр эрчиллииттэн күммүт саҕаланар. Атах сыгынньах сир кырсыгар хааман, алгыстанан баран чэйдиибит. Күн уотун сардаҥатын куоттарбаттыы хаста да төхтүрүйэн, Амма ыраас уутугар сүүрүктээх долгуҥҥа ыраастанан баран, сөтүөлээн чэбдигирэн, оҕолуу үөрдүбүт.
Аммаҕа Олоҥхо ыһыаҕа ыытыллыбыт пааркатыгар киирэн СӨ үтүөлээх артыыһа Варвара Аманатова «Амсат эрэ дьэдьэҥҥиттэн» ырыаҕа килиипкэ уһулуннубут. Быыһыгар Варвара Аманатова тыынарга, кылыһахха, сахалыы норуот ырыаларыгар куоласка арахсан ыллыырга үөрэннибит. Үс күн күн бокуойа суох сырыттыбыт. Хас биирдии күммүт умнуллубаттык ааспытыттан дуоһуйдубут. Күҥҥэ үстэ тотоойутук аһаатыбыт. Күн ахсын аспыт менюта уларыйа турар. Олохтоохтортон ыаммытынан үүтү, сүөгэйи, суораты атыылаһан амсайдыбыт. Үгүстэр норуот эмчитэ Зоя Николаевна Гороховаҕа илбийтэрэн, ыарыылара мүлүрүйэн, бэл тайахтаах кэлбит, хас да сыл арахпакка эрэйдээбит ыарыытыттан Абыйтан төрүттээх Аксинья-Өксүү Евсеева эмтэнэн, сирэйдиин сырдаата. Аксинья-Өксүү хас биирдии олоххут күнүн сыаналааҥ, үөрэ-көтө сылдьыҥ диэн махталлаах этиитэ хас биирдиибитигэр холобур буолар.
Хаҥалас улууһун Булгунньахтаах нэһилиэгиттэн «Эрчим» хаалыктаах хаамыынан дьарыктанар түмсүү далбардара кэлэн, барыбыт сүргэтин көтөхтүлэр, кинилэр идеяларынан аны үҥкүүлээн тэйэн, флешмобка кытынныбыт. Клим Семенович хас биирдии дьарыкпытын устан, клип оҥорон сүргэбитин көтөхтө. Куоракка төрөөбүт, улааппыт 76 саастаах Дарья Васильева сахалыы ыраас тылтан, ырыаттан, оһуокайтан олус астынна. Кини элбэх сиргэ туристаабыт, ол эрэн сахабыт сиригэр Аммаҕа, Бөтүҥҥэ Клим Федоров тэрийэр тууруттан олус астыммытын үллэһиннэ. Биир да чааспыт кураанах ааспата, барыта сонун диэн олус сөхтө. Ырыаһыт Варвара Аманатова үс күнү быһа ырыаларын толоруутун истэн дуоһуйдубут, кэнсиэрин истэн астынныбыт.
Бу быйылгы бэһис сезоҥҥа сылдьааччылар үгүстэрэ пенсионердар эрээри, үгүстэрэ үлэлии-хамсыы сылдьаллар эбит. Клим Семенович хас биирдии туриһыгар ураты болҕомтолоохтук сыһыаннаһан, сынньалаҥы үрдүк таһымнаахтык тэрийэригэр махтаннылар. Бастакы сыл сыыртан өрүскэ түһэргэ кирилиэс суох буоллаҕына, быйыл үһүс сылыгар барыта сиппит, кутаа уотун тула олорорго ыскамыайка тутуллубут. Утуйар дьиэлэрбит сиигэ суохтар, утуйар таҥас соҕуруу дойду гостиницатыттан уратыта суох, суунар дуус, өтүүктэнэр хос, ыраас туалет, ып-ыраас тэлгэһэ барыбытын астыннарда. Онон, туристар сынньанар усулуобуйаларын мэлдьи үрдүк таһымнаахтык тэрийэр Клим Федоровка бары махтанан кэллибит.
Марта Николаева
Дьааҥы улууһун Арыылаах орто оскуолатын саха тылын, литэрэтиирэтин учуутала, РФ уопсай үөрэхтээһинин туйгуна Петр Слепцов…
Ахсынньыга Дьокуускайга оҕолорго уонна ыччаттарга I өрөспүүбүлүкэтээҕи төрүт култуураҕа чөмпүйэнээт буолан ааспыта. Төрүт сахалыы эйгэни…
Сахалар билгэлэрэ Сахалар итэҕэллэринэн киэһэ таһырдьа улаханнык саҥарыа, айдаарыа суохтааххын, сир иччитин кыыһырдыаххын сөп. Түүн…
2025 сыл талааннаах бастыҥ ыччатынан Эрхаан Слепцову ааттыыбыт. “Айхал” диэн Дьулусхан Андросов таһаарбыт сахалыы киинэҕэ…
Айсен Николаев ахсынньыга Туһаайан этиитигэр ааспыт сыл ситиһиитин кэпсээтэ, кэлэр сылларга сайдыы тосхолун торумнаата, парламент,…
Бу күннэргэ күн-дьыл туруга хайдаҕый? Күнү-дьылы кэтээн көрөөччүлэр туох дииллэрий? Саха сирин арҕаа, соҕуруулуу-арҕаа ,…