ВИДЕО: Сэттэ буойун бырааттыы Тумусовтарга анаан Мэҥэ сэргэни туруордулар

Үөһээ Бүлүү Кэнтик нэһилиэгэр саҥа «Уйгу» түөлбэҕэ 7 буойун бырааттыы Тумусовтар ааттарынан уулуссаҕа искибиэр тутуутун бэлэмнэниитин чэрчитинэн Мэҥэ бэлиэ сэргэни түһэрдилэр.

Мэҥэ сэргэ аһыллыытыгар биир дойдулаахтарын Госдуума дьокутаата Федот Тумусов эҕэрдэлээтэ.

Санаттахха, Аҕа дойду Улуу сэриитигэр Кэнтик нэһилиэгиттэн  бир аҕа ууһуттан 7 бырааттыы Тумусовтар барбыттара. Тумусов Николай Петрович — 1941 сыллаахха сэриигэ ыҥырыллыбыта. 1943 сыллаахха бааһыран дойдутугар эргиллибитэ. Тумусов Терентий Петрович — 1941 сыллаахха сэриигэ ыҥырыллан барбыта. Курскай Дуга охсуһуутугар 1943 сыллаахха сураҕа суох сүппүтэ. Тумусов Сысой Степанович — 1943 сыллаахха Забайкальскай фроҥҥа сэриигэ ыҥырыллыбыта. «Кыһыл Сулус», «За Победу над Японией» мэтээллэринэн наҕараадаламмыта. 1946 сыллаахха дойдутугар эргиллэн кэлбитэ. Тумусов Петр Степанович — 1941 сылтан Ленинградскай фроҥҥа сэриилэспитэ. Пулеметунан өстөөх самолетун суулларан «За Отвагу» мэтээллээх. Тумусов Семен Федотович (Улахан Сэмэн) — 1941 сыллаахха сэриигэ ыҥырыллыбыта. 1943 сылга бааһыран дойдутугар эргиллибитэ. Тумусов Семен Федотович — 1945 сыллаахха Забайкальскай фроҥҥа матрос-артеллериһынан Японияны утары сэриилэспитэ. «За Победу над Японией» мэтээлинэн наҕараадаламмыта. Дойдутугар 1951 сыллаахха эргиллэн кэлбитэ. Тумусов Лаврентий Спиридонович — 1941 сыллаахха сэриигэ ыҥырыллан барбыта. «За Отвагу», «За Победу в в Великой Отечественной войне 1941-1945 гг.» мэтээллэринэн наҕараадаламмыт буойун-фронтовик.

«Биир аҕа ууһуттан сэриигэ кыттыбыт буойуттар ааттарын үйэтитэр, кэлэр көлүөнэҕэ харыстаан хаалларар өйдөбүнньүк бэлиэ Улуу Кыайыы 80 сылыгар аһыллыбыта ураты суолталаах. Алгыс түспүт сэргэтэ үйэлээх буоллун, буойун Тумусовтар ааттарын кэнэҕэски ыччаппытыгар сырдата турдун», — диэн Үөһээ Бүлүү улууһун баһылыга Валерий Николаев ТГ-ханаалыгар иһитиннэрдэ.