ВИДЕО: Сунтаардар — Тааттаҕа Манчаарыга (бастакы чааһа)

Сунтаар — Олоҥхо дойдутун күүстээхтэрэ, быһыйдара, бөҕөстөрө алгыс маанытын ылынан Манчаарыга туруннулар. Саха сирин олимпиадатыгар 67 төрүт оонньууну өрө тутар биир дойдулаахтарбыт мас тардыһыахтара, сүүрүөхтэрэ, ыстаныахтара, оҕунан, буулдьанан ытыахтара, хапсаҕайдыахтара, хабылыктыахтара, хаамыскалыахтара, гиирэ анньыахтара, ат сүүрдүөхтэрэ, дэгит төрүт көрүҥҥэ илин-кэлин түсүһүөхтэрэ.

От ыйын 6 күнүгэр Тааттаҕа айан тутан иһэн Төҥүлүгэ чэйдээн ааһаары «Дэгэт аартык» түһүлгэҕэ сунтаардар уран оҥоһуктарын көрөн үөрдүбүт. Ол туһунан биһиэхэ «Уют» чайной хаһаайына, урбаанньыт Иван Борисов кэпсээтэ.
Таатта айан аартыгар талыы-талба далбар хотуттар алаадьылаах кымыһынан күндүлээн үөрэ-көтө көрүстүлэр. Киһи сөҕө-махтайа көрөр ытык сирдэрэ сөргүтүллүбүтэ бэртээхэй. Манна Аҕа баһылыкпыт Нерюнгриттан Олоҥхо ыһыаҕыттан кэлэн иһэрин көрсөн кэпсэттибит.

Биһигини сунтаардары Ытык Күөлгэ — нэһилиэк баһылыга Егор Павлов көрсөн мааны сандалытыгар ыалдьыттата

Тускулаана Горохова-Кобельянова