ВИДЕО: Суутунан муниципалитекка аҕам саастаах дьахтары саахалланар туруктаах дьиэттэн көһөрөр эбээһинэс сүктэрилиннэ

Бүлүү улууһун прокуратурата 68 саастаах, үлэ бэтэрээнэ, 3-с группалаах инбэлиит дьахтар дьиэ-уот бырааба кэһиллибитин туһунан сайабылыанньатынан бэрэбиэркэни ыытта.

Бу туһунан СӨ Борокуратууратын пресс-сулууспата иһитиннэрэр. Суут кэмигэр быһаарыллыбытынан, сайабылыанньалаах дьахтар Бүлүү куоракка 1963 сыллаахха тутуллубут, 16 кыбартыыралаах элбэх кыбартыыралаах дьиэҕэ олорор эбит. Бу дьиэ күүскэ эргэрбитинэн сибээстээн, саахалланар туруктааҕынан билиниллибит уонна көтүрүллүөхтээх.

Ол эрээри, саахалланар туруктаах дьиэттэн көһөрөр болдьох ааспытын үрдүнэн, дьахтарга муниципалитет атын олорор дьиэни биэрбэтэх. Онон сибээстээн, суут борокуруор этиитинэн Бүлүү куорат дьаһалтатын дьахтарга олохтоммут ирдэбиллэргэ эппиэттиир, толору хааччыллыылаах дьиэни биэрэргэ эбээһинэстээтэ. Суут быһаарыыта сокуоннай күүһүгэр киирэ илик.