ВИДЕО: Таатта Уолбатыгар 70-ча кыталык кылбаара көттө

Таатта улууһун Уолбатыгар быйыл уонтан тахса кыталык кэлэн түспүтүн туһунан суруйан турабыт. Бу сырыыга кыталыктар кэрэ көстүүлэрин Семен Рахлеев видеоҕа устан үйэтиппит. Бу туһунан Семен санаатын үллэһиннэ:

— «Тыһаҕас охтубут» диэн Уолбаттан 3 км чугас сиргэ кустуур сирдээхпит. Быйыл кыталык аһары элбээбитин бэлиэтии көрдүбүт. Уопсайынан кыталыктар Уолба сиригэр тохтоон, сынньанан  ааһар буолбуттара биэс сыл буолла. Бастаан иккиэ эрэ этилэрэ. Быйыл 70-ча кыталыгы аахтыбыт. Маннык кэрэ көстүүнү биһиги айылҕаҕа сылдьар, кустуур эр дьон эрэ көрөн эрдэхпит. Кыталыктар кэрэ көстүүлэрин бар дьоммор көрдөрөөрү коптерынан устубутум.