ВИДЕО: Тааттаҕа нэһилиэк баһылыгын кырбаан эр киһи дьыалаҕа тардылынна

Таатта оройуонугар 31 саастаах эр киһиэхэ икки холуобунай дьыала тэрилиннэ.

Кини нэһилиэк баһылыгын кырбааһыҥҥа уонна полиция отделын соруйан малын-салын алдьатыыга уорбаланар. Бу туһунан Саха сирин Силиэстийэлиир кэмитиэтин пресс-сулууспата суруйда. Тахсыбыты быһылаан туһунан федеральнай ханаалларынан кытта таҕыста.

Быһылаан тахсыбытын туһунан дьуһуурунай чааска муус устар 1 күнүгэр олохтоох дьахтар тыллаабыт. Эр киһи дьахтар эрин кырбаабыт, полиция үлэһиттэрин сокуоннай ирдэбиллэрин утарбыт, ол иһин административнай хаайыы камератыгар хаайыллыбыт.

Силиэстийэ быһаарыытынан, уорбаланааччы нэһилиэк баһылыгын кырбаабыт. Ону таһынан, камераҕа олорон, эр киһи полиция отделын баайын- дуолун урусхаллаабыт: тимир ыскамыайканы алдьаппыт, көмүскүүр өстүөкүлэни үлүтүрүппүт, видео камераны сынньыбыт уонна истиэнэни курдат тахсыбыт. Уорбаланааччы суут быһаарыытынан билигин дьиэтигэр хаайыллан сытар. Холуобунай дьыала силиэстийэтэ салгыы бара турар, дьыаланы быраабы араҥаччылыыр уорганнар хонтуруолугар сылдьар.