ВИДЕО: Таркаайылар байыаннай дьайыыга көмөлөһөллөр

Саха сирин олохтоохторо уонна улуус дьаһалталара байыаннай дьайыыга сылдьар биир дойдулаахтарыгар өрүү көмөлөһөллөр. Бу өйөбүл хамсааһына хас биирдии киһи сүрэҕиттэн тахсар истиҥ сыһыан буолар.

Дьон бэйэлэрин тус үлэлэрин быыһыгар, баҕаларынан сылаас илиилэринэн таҥас тигэллэр, мал-сал, ас-үөл хомуйан ыыталлар. Бу – дьиҥнээх патриотизм уонна биир санаа көстүүтэ буолар. Хас биирдии улуус, нэһилиэк туора турбакка, байыаннай дьайыыга сылдьар уолаттарга көмөлөһөр.

Бу күннэргэ Ньурба улууһун Таркаайы олохтоохторо госпиталларга сытар уолаттарга бэйэлэрин көмөлөрүн ыыттылар.

“Ньурба улууһун Таркаайы олохтоохторугар көмөлөрүн иһин барҕа махталбытын тиэрдэбит. Саллаат Гена уол ийэтэ Анна Алексеева нэһилиэгин дьонуттан хомуйбут этин-аһын, куһун, балыгын барытын туттубут. Таксист Тит 9 чаас айаннаан кэлэн барытын тиксэрдэ. Аны билигин Москва уонна Санкт-Петербург куораттарыгар бу көмөнү ыытарга бэлэмниэхпит”, — диэн волонтер Светлана Диодорова-Лаврентьева кэпсиир.

Бу курдук үтүө санаалаах дьон дьиҥнээх күүһэ, өйөбүлэ тирэх буолар. Ким да туора туран хаалбакка,  байыаннай дьайыы сылдьар биир дойдулаахтарбытыгар бэйэлэрин көмөлөрүн оҥорон, улахан кылааттарын киллэрэллэр.