ВИДЕО: Томпоҕо үөһээттэн сууллубут кыыһы эвакуациялаатылар

Бэҕэһээ, от ыйын 19 күнүгэр, Томпо улууһугар баар Сунтаар Хайатыгар, Хаандыга бөһүөлэгиттэн 238 км тэйиччи сиргэ кыыс атаҕын эчэппитин туһунан иһитиннэрии киирбит. Бу туһунан СӨ Быыһыыр сулууспата суруйар.

19 саастаах кыыс сатаан хаампат, бөлөхтөрө күрүлгэн аттыгар уустук суоллаах сиргэ баарын иһитиннэрбиттэр. Координаттара биллэллэр. Онно биэс быыһааччы туруммут. Быһылааны гражданскай оборуона миниистирэ уонна Быыһыыр сулууспа начаалынньыга Иннокентий Андросов хонтуруоллаабыттар.

Онно эбии Уус-Ньараттан алта быыһааччылаах бөртөлүөт көппүт. Бу бөртөлүөт халааҥҥа үлэлээри, Уус-Ньараҕа баар эбит. 21:06 чааска көппүттэр.

Кыыс үс миэтэрэлээх үрдүктэн сууллубут. Кинини 11 быыһааччы 1280 миэтэрэ үрдүктэн 03:45 чааска түһэрбит. Кыыһы быыһыырга үлэ этэҥҥэ ааспыт.

Эчэйбит кыыһы Уус-Ньараҕа миэдиктэргэ туттарбыттар.