ВИДЕО: Тыйаатыр саҥа сүүрээнин биһирээтибит

Саха тыйаатырын үлэһиттэрэ Надежда Ильина, Жанна Капралова, Туйаара Петухова, Сиибиктэ Петрова, Мария Васильева, артыыстар Иннокентий Луковцев, Татьяна Легантьева 2024 сылга киирэн баран,  сонун бырайыагы саҕалаатылар.

Ол курдук, «Тыйаатыр дьоно» бырайыагы сыл саҕаланыаҕыттан хайыы-үйэ иккис төгүлүн ыытан, тыйаатыр олоҕор саҥа сүүрээни киллэрдилэр. Олунньу 22 күнүгэр Саха тыйаатырын артыыската Елена Маркова кини талааныгар сүгүрүйээччилэрин кытары көрүстэ, истиҥник сэһэргэстэ. Тыйаатыр Алампа аатынан дьоҕус саалатыгар кэлбит дьону Елена бэйэтэ оҥорбут алаадьытынан, муоруһунан күндүлээн көрүстүлэр.
Сэргэх сэһэннээх артыыска, чугас дьүөгэтэ Татьяна Легантьева кэпсэтиини хара маҥнайгыттан чэпчэкитик, көҥүл тыынынан ыытта. Иккиэн даҕаны Москватааҕы Щепкин аатынан тыйаатыр устуудьуйатын 2012 сыллаахха бииргэ бүтэрбит буоланнар, этэргэ дылы, ньэмнэрин билсэллэр. Онон «эдэр сааһын чуораанчыгын» кытары кэпсэтии кэккэ кистэлэҥнэри арыйыылардаах буолла.
Елена кэпсээнин быыһыгар кылыһахтаах тойугун иһитиннэрдэ, испэктээктэртэн быһа тардыылары көрдөрөн сүгүрүйээччилэрин «быара суох» ыыталаата. Чуолаан тыйаатыр артыыһа Павел Колесовтыын “Саха дьахталларын сэттэ мэтириэтэ» оонньууларыттан быһа тардыыларын көрдөрдүлэр. Санатан эттэххэ, 2018 с. Ньурбаҕа ыытыллыбыт “Сата” бэстибээл Елена Маркова чахчы кыайа-хото туппут “Саха дьахталларын сэттэ мэтириэтинэн» аһыллыбыта уонна кини “дьахтар бастыҥ оруолун” аатын ылан, Москваҕа стажировкаланан кэлбитэ.
«Тыйаатыр дьоно» бүгүҥҥү дьоруойа  Елена Марковаҕа бырайыак ааптардарын биир соһуччу бэлэхтэринэн кини сыанаҕа бииргэ оонньуур артыыстарын (партнердарын) билиниилэрин видеоҕа уһулан көрдөрүүлэрэ буолла. Артыыстар «Еленалыын сыанаҕа бэйэ-бэйэлэрин биир көрүүттэн өйдөһөллөрүн, таптаһалларын, киһини наһаа астыннарарын, сыанаҕа ыксал буоллаҕына, барыларыгар көмөлөһөрүн, артыыс быһыытынан үрдүк таһымнааҕын, испэктээккэ биир тыынынан оонньуулларын, кинини кытары оонньоон дьоллоноллорун, ханнык да оруолга дууһатын арыйарын» уо.д.а. астына бэлиэтээтилэр.
Оччолорго үөрэҕи саҥа  бүтэрэн кэлбит эдэркээн Елена Маркова тыйаатыр ытык кырдьаҕастара Анна Кузьминаны, Александра Иванованы, Мария Канаеваны, Мария Варламованы уо.д.а. кытары үлэлээбит дьоллоох. Ол да иһин,  сэһэргии олорон кинилэр сүбэлэрин-амаларын тылыттан тылыгар түһэрэн кэпсээтэ, кинилэртэн элбэххэ үөрэммитигэр ис сүрэҕиттэн махтанара хараҕа уоттанан ыларыттан, бэйэтэ олус дьоһуннанан түһэриттэн көһүннэ.

Көрөөччүлэр кинини үксүгэр травести артыыһынан билэбит. Саҥа туруорууга биир эмэ уол-кыыс оруола баар буолла да, арааһа, Елена Маркова оонньуура буолуо диэн бүтэйдии сэрэйэҕин, оннук да буолар. Василий Фомин саха классига Николай Мординов-Амма Аччыгыйа “Сааскы кэм”  арамаанын сыанаҕа туруорбута. Онно Е.Маркова Микиитэни оонньообутун көрөөччүлэр олус сөбүлээбиттэрэ уонна ылыммыттара. Эдэр артыысканы  уонна «Сааскы кэми» кытары тыйаатырга эмиэ атын салгын сайан киирбит курдуга.
Елена оруолларын барытын олус сөбүлүүрүн туһунан кэпсээтэ. Ол эрээри, кини  ханнык оруолу ыарырҕатыан сөп эбитий? Ол эбэтэр, биир көрөөччү саалаттан кумааҕыга суруйан ыыппыт ити ыйытыытыгар «Билигин оттомноох сааспар кэлбит киһи,  эдэркээн 18-20 саастаах кыыс оруолун, баҕар, ыарырҕатыам эбитэ буолуо», -– диэтэ.
Ити курдук,  артыысканы кытары кэпсэтии 2 чааһы быһа барбытын билбэккэ да хааллыбыт.
Манна даҕатан эттэххэ, Саха тыйаатырын артыыстара Нюргуяна Шадрина, Елена Маркова «Театр суолун устун…» диэн өссө биир саҥа бырайыактара Ютуб-ханаалга көстөн, хайыы үйэ көрөөччүлэр биһирэбиллэрин ылла.