ВИДЕО: Уран иис кэрэтинэн сайыны атаарыы…

Көмүс күһүн саҕаланан, сайын сылаас тыына биллэ-көстө уҕарыйан эрэр кэмигэр, Бүлүү улууһун Халбаакы нэһилиэгин «Утум ситимэ» түмсүүтүн Далбар Хотуннара уран тарбахтарынан айбыт-тикпит кэрэ таҥастарын кэтэн, айылҕаҕа тахсан, быйылгы сайыны махталы кытта атаардылар.

Түмсүү быйыл үлэтин-хамнаһын тохсус сылын бэлиэтиир. Ол кэм устата кинилэр иистэнэр эрэ дьоҕурдарын буолбакка, норуот утумун, төрүт үгэһин үйэтитэр, кэнчээри ыччакка тиэрдэр үтүө соругу толороллор. Түмсүүнү СӨ норуодунай уус-уран оҥоһуктарын маастара Надежда Яковлева салайан үлэлэтэр. Кини сатабыллаах салалтатынан хотуттартөрүт үгэс быстыбат ситимин салҕаан, сахалыы таҥаһы тигэринэн дьарыктаналла, араас оҥоһуктары айаллар. Бу туһунан Халбаакы нэһилиэгин ТГ-ханаала иһитиннэрэр.

«Утум ситимэ» түмсүү үлэлэрэ улуус, өрөспүүбүлүкэ таһымын ааһан, бүтүн Арассыыйаҕа, аан дойдуга тиийэ биллэр. Кинилэр оҥоһуктара норуоттар икки ардыларынааҕы, дойду үрдүнэн ыытыллар быыстапкаларга ситиһиилээхтик кыттан, үрдүк сыанабылы ылаллар. Бу – хас биирдии кыттааччы дьоҕурун, иискэ тапталын уонна, биллэн турар, салайааччыларын үтүөтүн түмүгэ. Бу видеоҕа көрөр кэрэ көстүүлэргит – барыта кинилэр бэйэлэрин илиилэрин иэйиилээх ииһинэн тикпит түмүгэ. Бу сырыыга иистэнньэҥнэр икки тиэмэни арыйбыттар. Маҥнайгыта – саха дьахтарын сайыҥҥы, ыһыахтыыр халадаай ырбаахыларын көрдөрөр. Хас биирдии халадаай, кэһиэччик – барыта сахалыы сиэринэн, быһыытынан-таһаатынан, киэргэлинэн оҥоһуллубут. Иккис кэлиэксийэ – «Алаас сиэдэрэй сибэккилэрэ» диэн ааттаах. Манна хас биирдии хотун дойдутун алааһын таптыыр сибэккитин уобараһын таҥаска түһэрбит.  Бу көстүүмнэр киһи хараҕар быраҕыллар чаҕылхай өҥнөрүнэн, ураты быһыыларынан уонна оһуордарынан-мандаардарынан болҕомтону тарта. «Утум ситимэ» түмсүү кыттыылаахтара маннан тохтооботтор. Кинилэр инникитин даҕаны саха таҥаһын кэрэтин, норуот ииһин баайын эдэр көлүөнэҕэ тиэрдэр, үйэтитэр сыаллаахтар. Уран тарбахтаах Далбар Хотуннарга айар-тутар аартыктара арылла турдун, ситиһии үктэллэрэ үрдүү турдун!