ВИДЕО: Уутун, маһын дьиэтигэр бэйэтэ таһар өйдөөх ат

Бу күннэргэ социальнай ситимнэринэн биир сыарҕалаах ат бөтүөннээх ууну бэйэтэ дьиэтигэр илдьэн иһэр видеота киэҥник тарҕанна. Ханнык улууһа, нэһилиэгэ ыйыллыбатах буолан, соҕуруунан-хотунунан ирдэһэн, дьэ буллубут.

Ирдэһэн билбиппит, Хаҥалас улууһун Тиит Арыы нэһилиэгин Ульяна, Иннокентий Самсоновтар аттара Чаҕыл эбит.

— Анаан-минээн үөрэппэтэхпит. Хаһаайына Иннокентий Васильевич мэлдьи кэпсэтэ сылдьар. Ойбонтон ууну бөтүөннэргэ кутан баран: “Дьиэҥ диэки бар” – диэн дьаһайар. Ата  кырдьык-хордьук хаама турар. Хаһаайына олус ыраах хаалбыт буоллаҕына туран кэтэһэ түһэр, чугаһаатаҕына салгыы хаамар. Ойбоммут биһигиттэн, сыыспат буоллахпына, балтараа килэмиэтир курдук тэйиччи буолуо, букатын үөһэ олоробут. Мас мастыыр сирбит өссө ыраах. Үлэлии үөрүйэх, маска эмиэ куруук ити курдук сылдьар. Уопсайынан, Иннокентий дьиэ кыылларын барыларын кытта өрүү кэпсэтэ сылдьар, ол иһин эбитэ дуу, тугу этэрин өйдүүр курдуктар.

Видеоны үөлэннээхпит устубут. Дьон өрүү дьиктиргиир буолан, видеоҕа элбэхтик көстөр. Чаҕыл бэйэтэ даҕаны хаартыскаҕа түһэрэллэригэр, видеоҕа усталларыгар үөрүйэх, анаан-минээн тохтоон биэрэр” – диэн Ульяна Иннокентьевна кэпсиир.

Чаҕыл 12 саастаах эбит. Эрдэ Уоллара диэн аатынан сылдьыбыт. Иннокентий Васильевич кэлин үлэһит акка, көмөлөһөөччүгэ наадыйан, аттаппыт. Холугар чаҕыл курдук бэлиэлээҕин иһин Чаҕыл диэн ааттаабыт. Үлэһит аты ыт доҕоро, лабрадор боруодалаах Жора куруук арыаллыыр. “Эмиэ бэрт өйдөөх ыт, элбэх хамаанданы билэр, өрүү батыһа сылдьар. Үөр сылгы эҥин баар буоллаҕына аппыт аралдьыйар, оччоҕо ыппыт үүртэлиир. Ити иккис ыт биһиэнэ буолбатах, атаһа быһыылаах” – диэн хаһаайка кэпсиир.

Тыа сирин үлэһит дьонун дьиэтээҕи кыыллара сороҕор ити курдук өйдөөх, толоругас буолаллар. Кэпсэтиэхтэрин киһилии эрэ саҥарбат барахсаттар буоллахтара.