ВИДЕО: Үөһээ Бүлүүгэ ойуурга муммут киһини быыһаатылар

Атырдьах ыйын 8 күнүгэр киэһэ 22:40 чааска Үөһээ Бүлүүтээҕи ЕДДС сулууспатыгар 1955 с.т. эр киһи сүппүтүн туһунан иһитиннэрии киирбит.

Кини бэйэтэ быыһааччыларга эрийбит, ол эрээри геолокация көмөтүнэн  тыаттан таһаарар кыаллыбатах — саастаах киһи гаджеттары сатаан туһамматах уонна сибээс мөлтөх эбит.

Эр киһини көрдүү Саха сирин Быыһыыр сулууспатын Бүлүүтээҕи көрдүүр-быыһыыр этэрээтин быыһааччылара уонна полиция үлэһиттэрэ барбыттар. Киһини Харыйалаах диэн сиргэ, бэйэтэ ыйбыт сириттэн 800-чэ миэтэрэ тэйиччиттэн булбуттар.

Бөлөх салайааччыта Иван Иванов этэринэн, кини тыаҕа ыраах атын сиргэ баран иһэрин геолокациянан көрөн, тохтууругар уонна көмө күүтэригэр модьуйбуттар. Сотору кэминэн быыһааччылар кинини хара тыаттан таһааран, дьиэтигэр илдьэн биэрбиттэр. Бу туһунан Саха сирин Быыһыыр сулууспата иһитиннэрэр.