ВИДЕО: Үөһээ Бүлүүгэ оскуола Саҥа дьыллааҕы киэргэтиитэ дьон болҕомтотун тарта

Саҥа дьылбыт чугаһаан ким хайдах дьоҕурдааҕынан, сатабыллааҕынан тиэргэнин, тэрилтэтин иннин киэргэтэр. Элбэх улууска социальнай тэрилтэлэр иннилэригэр араас өҥүнэн дьиримниир уоттардаах лаглайбыт харыйалар, муус-хаар оҥоһуктар дьэҥдэйдилэр.

Быйыл Үөһээ Бүлүү улууһун Ю.Н.Прокопьев аатынан 3-с нүөмэрдээх орто оскуолата тиэргэнин олус кэрэтик киэргэттэ, Саҥа дьыл тыынын биэрдэ.
Олбуоруттан саҕалаан араас гирлянданан киэргэтиллибит, оскуолаҕа киирэр ааҥҥа диэри хаартан остуоруйалар, мультиктар араас дьоруойдара оҥоһуллан турбуттар. Оскуола Үөдүгэй нэһилиэгэр киирсэр эрээри Үөһээ Бүлүү сэлиэнньэтин олохтоохторун сөбүлээн көрөр сирдэринэн буолла.

Хаар оҥоһуктары элбэх оҕолоох ыал аҕата Үөдүгэй олохтооҕо  Олег Петров, ҮөҺээ Бүлүү нэһилиэгин олохтооҕо Игорь Шологонов, оскуола үлэһиттэрэ Мыкытыа Игорь Уйбаан уола, Баппаҕай Дьулусхаан Баппаҕай уола оҥордулар, идеятын толкуйдаабыт, видеону оскуола дириэктэри хаһаайыстыбаннай чааска салайааччы Айталина Сергеевна Ефимова оҥорбут.