ВИДЕО: Үлэтигэр атынан сылдьар Игнат Яковлев

Билигин уулуссаҕа аттаах киһини көрөр сэдэх көстүү. Сунтаарга эдэр уолаттар үлэлэригэр атынан сылдьалларын көрөн киһи астынар.

Сарсыарда саһарҕа тахсыыта Игнат Яковлев атыгар олороот үлэтигэр турунар. Кини Сунтаардааҕы олорор дьиэ коммунальнай сервиһин тойоно, улуус депутата. Дьиҥэ тимир көлө арааһа киниэхэ буоллаҕа, ол эрээри ат үрдүгэр олорбута үһүс сыла. Игнат Яковлев: «Уруккуттан аттаныахпын баҕарар этим. Үс сыл анараа өттүгэр аттанан баран бастаан сиэтэн сылдьарым, онтон айааһаабытым. Тыыннаах кыыллыын алтыһар үчүгэй буоллаҕа, арай кыһын тымныы, ол иһин түүлээх таҥас арааһын тиктэрдим: бэргэһэ, сутуруо, аны сон тигиллэн бүтэн эрэр», — диэн кэпсээтэ.

Билигин аттаах киһини көрөр сэдэх көстүү. Игнат уһун уҥуохтаах, сахаҕа көрүҥнээх эр бэрдэ ат үрдүгэр буоллаҕына киһи эрэ бары кэрэхсии көрөр.

Сунтаар олохтооҕо Надежда Егорова: «Куруутун сэргии көрөбүн, бэйэм эмиэ акка олус чугаспын, аттаах киһини көрдөхпүнэ куруутун ат үрдүгэр буолар билигин аттыбар суох кэргэммин саныыбын», — диэн санаатын үллэһиннэ.

Салайааччы үс миинэр миҥэлээх: Дохсун, Сулус, Чолбон. Бу аттарын сыарҕалыыр, тэлиэгэлиир. Өссө атастарын аты айааһыырга үөрэтэр. Ону кытта булчут ыттара элбэхтэр. Өссө оҕолоро аттар ноһуомун кууллаан атыылыыллар эбит.

Игнат сэлэспэтин устууларыгар Сунтаар киэһэтигэр аттаах дьоннор көрсөн кэпсэтэллэрин кэрэхсээтим. Ол онно Игнат: «Хайа тугу гына сылдьаҕын?», Колята: «Хатааһылыы сылдьабын, уматык сыаната үрдээн маннык сылдьабын», — диэн хоруйдуур. Кырдьыга да оннук… бэйэм ат үрдүгэр буолаат: «Оо, арай бары ат үрдүгэр сырыттарбыт төһө эрэ дириҥ толкуйдаах, киэҥ көрүүлээх буолуо этибитий?!» — дии санаатым.

ТУСКУЛААНА ГОРОХОВА-КОБЕЛЬЯНОВА