ВИДЕО: Юлияна Кривошапкина -50С кыраадыс тымныыга хомуска оонньоото

Аан дойдутааҕы хомусчут-виртуоз Юлияна Кривошапкина -50 кыраадыс тымныыга хомуска оонньоото.

«Маннык эспэримиэни ыытарым бастакы сырыым буолбатах. Аҕыйах сыл анараа өттүгэр -46° кыраадыс тымныыга хомуска эмиэ оонньообутум уонна өссө уустук экстремальнай усулуобуйаҕа оонньоон  холонорго интэриэһиргээбитим. Салгын температурата -50° кыраадыс тымныыга тиийэ түспүтүгэр соһуччу халлаан сырдыыта, тумаҥҥа, күн тахсарын көрсөргө быһаарыммытым. Туох да бэлэмэ суох этим да, баҕа санаам баһыйбыта. Видеоҕа уһулбут дьүөгэлэрбэр, Арыйаанаҕа уонна Аленаҕа, махталбын тиэрдиэхпин баҕарабын. Баҕа санаабын олоххо киллэрбиппиттэн олус үөрэбин. Хомус тыаһа маннык усулуобуйаҕа атыннык иһиллэр», — диэн СИА-ҕа Юлияна Кривошапкина кэпсээтэ. Хомусчут бу эспэримиэни уопута суохтары хатылаабаттарыгар ыҥырда.