VIII  “Азия оҕолоро” Оонньуулар түмүктэринэн

VIII “Азия оҕолоро” оонньуулары түмүктүүр пресс-кэмпириэнсийэ от ыйын 10 күнүгэр Оонньуулар кылаабынай пресс-кииннэригэр буолла. Спикердэр Оонньуулар түмүктэринэн бэйэлэрин санааларын эттилэр, суруналыыстар ыйытыыларыгар хоруйдаатылар.

Гаврил Цыпандин, “Азия оҕолоро” норуоттар икки ардыларынааҕы кэмитиэт генеральнай дириэктэрэ: “Аан дойдуга уустук балаһыанньа буолан да турдар, 24 дойдуттан кэлэн кыттыбыттара элбэҕи этэр. “Азия оҕолоро” бу күрэхтэһии эрэ буолбатах, Оонньуулар чэрчилэринэн оҕолорго үөрэтэр бырагыраамалары киллэрэбит, урукку оонньууларга кыттан баран, спорка ситиһиилээх оҕолору мунньан, выпускниктар сойуустарын тэрийбиппит, көһө сылдьар эдэр олимпиецтар пуорумнарын ыыттыбыт”.

Успуорт миниистирэ Леонид Спиридонов, биһиги хамаандаларбыт оҕолоро ситиһиилээхтик кыттыбыттарын тоһоҕолоон бэлиэтээтэ: “Бүтэһик күн иннигэр Саха сирин, Беларусь, Москва хамаандалара бары биир тэҥ очукуолаах этилэр. Бүтэһик күҥҥэ волейболга Беларусь уолаттарга, кыргыттарга хамаандалара кыайан, үһүс миэстэ буолбуттара. Биһиги хамаандабыт төрдүс миэстэ да буоллар, Казахстан, Москва, Арассыыйа уокуруктарын хамаандаларын кыайбыта элбэҕи этэр. Холобур, Беларусь хамаандатыгар бастакы нүөмэрдээх спортсменнара кыттыбыттара. Саха сирин хамаандата 106 официальнай мэтээллээх. 1,5 млрд солк. спортивнай эбийиэктэри өрөмүөннүүргэ бэриллибитэ, билигин итиннэ нэһилиэнньэ дьарыктаныа. РФ успуордун миниистирэ Михаил Дегтярев кэлэн, биһиги национальнай көрүҥнэрбитин, Сайсарытааҕы саҥа эбийиэги, Оонньуулар аһыллыыларыгар театрализованнай көрдөрүүнү көрөн сөхпүтүн биллэрбитэ.  РФ бырабыыталыстыбатын вице-премьерэ Дмитрий Чернышенко “Звезднай” микрооройуоҥҥа тутулла турар катокка сылдьыбыта, волейбол киирсиитин көрбүтэ, Оонньуулары түмүктүүр тэрээһиҥҥэ сылдьыбыта, Арассыыйаҕа эрэ буолбакка, Азия континеныгар оҕолорго аналлаах бөдөҥ тэрээһини тэрийбиппитигэр махтаммыта. Оонньуулар тэрээһиннээхтик барбыттарыгар өрөспүүбүлүкэ салалтатыгар махталбын тиэрдэбин”.

VIII “Азия оҕолоро” Оонньуулар дирекцияларын генеральнай дириэктэрэ Михаил Сивцев:

“Оонньууларга 2757 киһи кытынна, ол иһигэр 1934 спортсмен. Саха сирин 1-кы хамаандатыгар 245 киһи, 2-с хамаандаҕа 125 спортсмен кытынна. 239 кэмпилиэк мэтээл, ол иһигэр демонстрационнайдары киллэрэн туран, барыта 1426 мэтээл оонньонно. Сэргэлээх, Оонньуулар бэлиэлээх мэтээллэр аан дойду үрдүнэн тарҕаннылар. 11 күн устата пааркаҕа култуурунай тэрээһиннэргэ 140 тыһ. киһи сырытта, Комсомольскай болуоссакка 13 кэнсиэр, 4 аралдьытар-саататар тэрээһин ыытылынна. Куоракка 53 эбийиэккэ култуурунай бырагыраама, 2000-тан тахса киһиэхэ экскурсия ыытылынна”. Михаил Сивцев Оонньуулар тэрээһиннээхтик ыытыллалларыгар көмөлөспүт бары хамыыһыйарга, тэрилтэлэргэ махталын биллэрдэ.

Бу Оонньууларга биир тутаах хайысхаҕа – куттал суох буолуутугар улахан болҕомто ууруллубута хаһааҥҥытааҕар да биллэр этэ. Гражданскай оборуона уонна нэһилиэнньэҕэ куттал суох буолуутун хааччыйыыга миниистир Дмитрий Лепчиков эппитинэн, бу соругу туһааннаах тэрилтэлэр үлэһиттэрэ чуолкай өйдүүллэрэ уонна кыаллары барытын толорбуттара.

Кэлэр Оонньуулар ханна буолуохтарай диэн ыйытыыга, кыһыҥҥы уонна сайыҥҥы Оонньуулар бу сыл бүтүүтэ чуолкайданыахтара диэтилэр.