Виктор Губарев: “Эппит тылыгар эппиэттиэхтээх”

Дьокутаат Александр Иванов блогер Джем Кыраҥҥа биэрбит интервьюта дойду үрдүнэн сата баһын тарта. Биһиги дьон манна туох санаалааҕын ыйыттыбыт.  

Виктор Губарев, КПРФ рескомун бастакы сэкирэтээрэ, Ил Түмэн култуураҕа, маассабай иһитиннэриигэ кэмитиэтин бэрэссэдээтэлэ:

“Мин Александр Иванову Ньурба куорат дьаһалтатын баһылыгынан үлэлиэҕиттэн билэбин. “Саҥа дьон” фракцияҕа киириэҕиттэн үлэбит чэрчитинэн билсэбит-кэпсэтэбит. Кини оппозиционер быһыытынан өрөспүүбүлүкэ социальнай-экэнэмиичэскэй олоҕун сэмэлиирэ, ол гынан баран быйыл Ил Дархан отчуотун ылыммыта, сөбүлэспитэ. Оттон биһиги, хомуньуустар, уопсай уопсастыба туруга, өрөспүүбүлүкэбит социальнай-экэнэмиичэскэй олоҕо тупсарын туһугар үлэлиибит, ситэтэ суох үлэ баар буоллаҕына аһаҕастык этэбит, сэмэлиибит, ол барыта үчүгэй, хаачыстыбалаах буоллун диэн.

Оттон бу Александр Иванов биэрбит интервьюта олох атын ис хоһоонноох, олох атын тиэмэлээх. Бу дойду биир сомоҕо буолуутун, биир устуоруйалаахпытын таарыйар дьыала. Кини иитиитэ кыайтарбатах кыра оҕо буолбатах, Ил Түмэн дьокутаата, тугу этэрин өйдөөн-дьүүллээн туран саҥарар киһи, эппит тылыгар эппиэттиэхтээх. Билигин арҕаа байыаннай дьайыы буола турар. Ону таһынан информационнай сэрии биир да түгэҥҥэ тохтообокко барар. Арассыыйаҕа олорор норуоттары араара сатыыр күүс туох баар кыаҕынан үлэлиир. Арҕаа дойдулар харчыларыгар “Свободная Якутия” диэн иирсиини, атааннаһыыны күөртүүр дьон куйаар ситиминэн тахса тураллар. Бу сэтинньигэ бэриллибит интервьюну билигин дьэ таһаардылар. Тоҕо, туох сыаллаах? Биллэн турар, дьон кэпсэтиитин таһаараары. Ону ситистилэр, бүтүн дойду үрдүнэн дьүүллэһии бара турар. Онон итинник тосту-туора тыллаһыыны, өйү-санааны олох төрдүттэн тохтотуохха наада”.