Виктор Лебедев аатыттан бастакы кылаас үөрэнээччилэригэр бэлэхтэри туттардылар

Балаҕан ыйын 1 күнүгэр Томпо уонна Таатта улуустарыгар барыта холбоон 332 оҕо бастакы кылааска үөрэнэ киирдэ. Кинилэр норуот дьокутаата, «Саханефтегазсбыт» генеральнай дириэктэрэ Виктор Лебедев аатыттан бэлэхтэри туттулар.

Таатта-Томпо быыбардыыр уокурук норуодунай дьокутаата Виктор Лебедев бу үтүө үгэһи — оҕолорго уонна төрөппүттэргэ сэттис сылын бэлэхтиир.

Ону таһынан, кини көҕүлээн, бу оройуоннар оскуолаларын кыһыл көмүс уонна үрүҥ көмүс мэтээллэринэн бүтэрбит оҕолор сыаналаах бэлэхтэри тутталлар. Сааскы сынньалаҥ кэмигэр Виктор Лебедев үбүнэн өйөөн, улахан кылаас үөрэнээччилэригэр анаан өрөспүүбүлүкэ үрдүк үөрэҕин преподавателлэрэ кэлэн, БКЭ туттарарга бэлэмниир консультациялары ыыталлар.

Оттон Саҥа дьыл саҕана Томпо уонна Таатта улууһугар олох уустуктарыгар түбэспит оҕолорго минньигэс бэлэхтэри норуот дьокутаата ыытар.

Яна Байгожаева.