Дьулустаан Сергеев, ЯСИА
Саха тустуутун оскуолатын уон биэс иитиллээччитэ успуорт маастара, Ил Түмэн норуот дьокутаата Александр Крылов кэриэһигэр ыытыллар Бүтүн Россиятааҕы күрэхтэһии мэтээллэрин ыллылар. Олортон үһэ – кыһыл көмүс наҕараада, диэн ЯСИА иһитиннэрэр.
Бүтүн Арассыыйатааҕы күрэхтэһии дойду араас эрэгийиэннэриттэн, ону таһынан тас дойдулар хамаандаларыттан 150-ча кыттааччыны түмтэ. Саха тустууктара үс ыйааһын категориятыгар кыайыылаах таҕыстылар.
Саамай чэпчэки ыйааһыҥҥа (57 кг) кыһыл көмүс мэтээли Федор Постников ылла. Кини Алдар Шаракчиновы, Жаргал Баяндуевы (Бурятия), Альберт Оконушкины (Саха сирэ), Артур Чебодаевы (Хакасия) кыайан, финалга биир дойдулааҕын Любомир Ашеины баһыйан таҕыста.
Саха сиригэр өссө биир кыһыл көмүс мэтээли Константин Капрынов (74 кг) ылла. Финалга киирсиигэ чурапчы бөҕөһө Дьааҥы улууһуттан сылдьар Айсен Потаповы кыайда. Ити иннинэ Иннокентий Бабарановы, Давид Чириковы уонна Юрий Старостины кыайбыта.
Оттон 70 киилэҕэ диэри ыйааһыҥҥа саха тустуутун оскуолатын иитиллээччитэ Виктор Рассадин бастыҥынан ааттанна. Кыһыл көмүс мэтээл иһин киирсиигэ кини эдэр саха күрэсчитин Анатолий Иванову 11:0 ахсаанынан кыайда. Эрдэтээҥҥи киирсиилэргэ Рассадин Монголия бэрэстэбиитэлин, саха уолаттарын Игорь Матвеевы уонна Аслан Трофимовы кыайталаабыта.
Саха тустууга Виктор Рассадин Александр Крылов кэриэһигэр ыытыллар Бүтүн Арассыыйатааҕы турнир тэрийээччилэриттэн мөлүйүөн солкуобай хаһаайынынан буолла. Кини күрэхтэһии кыайыылаахтарын ортотугар ыытыллыбыт сэрэбиэйи ситиһиилээхтик таһаарда. Ол курдук, мөлүйүөн солкуобайы оонньотууга сэрэбиэйи турнир кыайыылаахтара таһаардылар: Федор Постников, Кежик Монгуш, Чаяан Монгуш, Виктор Рассадин, Константин Капрынов, Никита Сучков, Азрет Улимбашев, Дмитрий Зайнидинов, Юрий Иванов уонна Остап Пасенок. Кинилэртэн саамай табыллыылаахтара, 70 киилэҕэ диэри ыйааһыҥҥа кыайыылаах тахсыбыт Виктор Рассадин буолла. Тэрийээччилэр киниэхэ мөлүйүөн солкуобайы уу харчынан туттардылар. Бүтүн Арассыыйатааҕы күрэхтэһиигэ кыайыылаахтар ортолоругар маннык харчылаах сэрэбиэйи номнуо төрдүс сылын субуруччу ыыталлар. Бастакы мөлүйүөнү 2022 сыллаахха Красноярскайтан Дмитрий Зайнидинов, 2023 сыллаахха — Бурятияттан Тумэн Бодиев, оттон 2024 сыллаахха — Саха сириттэн Айсен Потапов ылбыттара.
Тохсунньу 9 күнүгэр Уус Алдан улууһугар Мүрүгэ "Түһүлгэ" киин балаҕан-дьиэтигэр Саха Өрөспүүбүлүкэтин Суруйааччыларын сойууһун чилиэнэ,…
Доруобай буолуу төрдө. Тыыныынан эмтэнии биир саамай былыргы ньымата -- хатха-йога. Биһиги кэммитигэр биир сиргэ…
Күн-дьыл билгэтин төһө билэҕитий? Бу туһунан И.М.Сосин "Күн-дьыл билгэтэ" кинигэтигэр сиһилии суруллар. Тымныы кыһын буоларыгар:…
Дьааҥы улууһун Арыылаах орто оскуолатын саха тылын, литэрэтиирэтин учуутала, РФ уопсай үөрэхтээһинин туйгуна Петр Слепцов…
Ахсынньыга Дьокуускайга оҕолорго уонна ыччаттарга I өрөспүүбүлүкэтээҕи төрүт култуураҕа чөмпүйэнээт буолан ааспыта. Төрүт сахалыы эйгэни…
Сахалар билгэлэрэ Сахалар итэҕэллэринэн киэһэ таһырдьа улаханнык саҥарыа, айдаарыа суохтааххын, сир иччитин кыыһырдыаххын сөп. Түүн…